भांगरभूंय | प्रतिनिधी
कासार समाजाक फुडल्या कांय म्हयन्यांत दर्जो मेळपाची शक्यताय
पणजीः कासार समाजा उपरांत गोमंतक मराठा समाजानय हेर मागास वर्गांयांचो (ओबीसी) दर्जो दिवपा खातीर ओबीसी आयोगा कडेन परतून अर्ज सादर केला. तांच्या अर्जाचेर सुनावणी बेगीन सुरू जातली. जाल्यार कासार समाजाच्या अर्जा प्रमाण आयोगान सुनावणी पुराय केल्या आनी आयोग कासार समाजाची सध्याची परिस्थिती प्रत्यक्ष तपासपाचो आसा.
ओबीसी आयोगाचे अध्यक्ष मनोहर अाडपयकार हांणी शुक्रारा आमच्या प्रतिनिधी कडेन उलयतना ही म्हायती दिली. गोमंतक मराठा समाजान कांय वर्सां आदीं ओबीसी दर्जो दिवपा खातीर आयोगा कडेन अर्ज केल्लो. आयोगान ताचेर सुनावणीय सुरू केल्ली. पूण कांय कारणांक लागून सुनावणी थांबयली. पूण, गोमंतक मराठा समाजान परतून एक फावट ओबीसींत आस्पाव करपा खातीर अर्ज केल्ल्यान तांच्या अर्जाचेर परतून सुनावणी घेतले, अशें अाडपयकार हांणी सांगलें.
मजगतीं, कासार समाजान केल्ल्या अर्जाचेर फाटलीं कांय वर्सां सुनावणी चालू आशिल्ली. मजगतीं, जिल्होधिकाऱ्यान ह्या समाजाची सध्याची समाजीक आनी शिक्षणीक स्थिती विशीं अहवाल ओबीसी आयोगाक सादर केलो. आतां आयोगानच ह्या समाजाची समाजीक आनी शिक्षणीक स्थिती पळोवपाचें थारायलां. देखून फुडल्या दोन ते तीन म्हयन्यांत कासार समाजाक ओबीसी दर्जो मेळूंक शकता असोय उल्लेख अाडपयकार हांणी केलाे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
