भांगरभूंय | प्रतिनिधी
भांगरभूंय । प्रतिनिधी
पणजीः गोंयांतल्या तरणाट्यांक यूपीएसी सारक्या सर्तीच्या परिक्षे खातीर तयार करपा खातीर गोमंतक मराठा समाजात आतां फुडाकार घेतला. बोर्डे-दिवचल हांगा तरणाट्यांक फावो तें प्रशिक्षण दिवपा खातीर गोंयची आदली मुख्यमंत्री शशिकलाताई काकोडकार हिचे यादस्तीक अकादमी सुरू करतले अशी म्हायती समाजाचो अध्यक्ष आनंद वाघुर्मेकार हांणी पणजे घेतिल्ले पत्रकार परिशदेंत दिली. शशिकलाताई काकोडकार प्रोफेशनल अकादमी अशें हे संस्थेचें नांव आसा.
हे अकादमीचो बुन्यादी फातोर शेनवार 25 जूनाक बसयतले. ह्या वेळार समाज वावुरपी आनी उद्देजक मिलिंद पिळगांवकार, राज्यसभा खासदार विनय तेंडुलकार, दिवचलचो आमदार डॉ चंद्रकांत शेट्ये आनी नगराध्यक्ष कुंदन फळारी हाजीर रावतले. अकादमीचो हो सुमार 3.5 कोटी रुपया खर्च येतलो. दोन माळेचे हे इमारतींत संगीत शिक्षण तशेंच सर्तीच्या परिक्षेचें प्रशिक्षण दितले. फुडल्या 270 दिसांत अकादमीचें काम पुराय जातलें अशें वाघुर्मेकार हांणी सांगलें.
साबार लोकांनी तशेंच गोमंतक मराठा समाजांतल्या भावांनी ह्या प्रकल्पाक अर्थीक मजत दिवची अशें आवाहन करतना अकादमी सगल्या समाजांतल्या तरणाट्यां खातीर आसतली अशें वाघुर्मेकार हांणी सांगलें. पत्रकार परिशदेक कृष्णा आसगांवकार, मंगेश कुंडयकार, विनोद जांबावलीकार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
