भांगरभूंय | प्रतिनिधी
15 मिण्टांनीच सोंपयली बसका; दुसऱ्या गटाचे बसकेंत साबार थाराव
भांगरभूंय । प्रतिनिधी
वास्कोः गोमंतक भंडारी समाजान आयतारा 6 ऑक्टोबराक आपयिल्ले साबार बसकेंत वादावादी, एकामेकाच्या आंगार धांवून वचप, मुखेल दार आडावप बी अशे प्रकार घडले. साबार बसकेंत पुलिसांक आपयले उपरांत खुबळिल्ल्या कांय जाणांनी पुलिसांक धांवडावन घातले आनी समजाच्या अध्यक्षाक प्रस्न विचारलो. समाजान आपयिल्ले साबार बसकेंत फक्त 15 मिण्टांनी वावर सुची वयले विशय सोंपले उपरांत अध्यक्ष अशोक नायक आनी कार्यकारिणी समितीन थंयच्यान वचप पसंत केलें.
17 नोव्हेंबराक वेंचणूक घेवपाचें तांणी जाहीर केलें. पूण हाजीर आशिल्ल्यांनी ताका हरकत घेवन तेच माचयेर अॅड. रवीराज चोडणकार हांचे अध्यक्षते खाला बसका घेवन कांय म्हत्वाचे थाराव संमत केले.
दोनूय गटांनी एकामेकांची बसका बेकायदो आशिल्ल्याचो दावो करून कांय मुद्दे उपस्थीत केले.
गोमंतक भंडारी समाजान वास्कोच्या कोमुनिदाद हॉलांत साबार बसका आपयल्ली. ह्या वेलार अध्यक्ष अशोक नायक, उपाध्यक्ष देवानंद नायक, सरचिटणीस फक्रू पणजीकार आन हेर पदाधिकारी, वांगडी माचयेर हाजीर आशिल्ले.
साबार बसका सुरू जाताच एक वांगडी प्रस्न उपस्थीत करचे खातीर उबो रावलो, तेन्ना थंय आशिल्ल्या पुलीस उपनिरिक्षकान ताका आडायलो. ताका लागून थंय एकूच बोवाळ सुरू जालो आनी लोकांनी पुलिसांक थंयच्यान धांवडावन घातले. ते उपरांत पुलीस हॉला भायर वचून उबे रावले.
ते उपरांत फाटले बसकेचो इतिवृतांत वाचप, जमा खर्चाक मान्यताय दिवप, वेंचणूक समिती वेंचप, वेंचणुकेची तारीख जाहीर करप हे चार विशय गडबडींत मांडले. कांय मिण्टां भितर बसका सोंपिल्ल्याचें जाहीर करून कार्यकारिणी समितीचे पदाधिकारी आनी वांगडी माचये वयल्यान खाला देंवले. त्या वेळार तांकां प्रस्न विचारपाचो कांय जाणांनी यत्न केलो. भायर वचपाचें दार आडायलें तेन्ना एकामेकाच्या आंगार धांवून वचपाचे प्रकार घडले. अखेर पुलिसांक हस्तक्षेप करचो पडलो. पुलिसांचें संरक्षण घेवन अध्यक्ष आनी कांय जाण भायर गेले. ते परांत हाजीर आशिल्ल्यांनी अॅड. चोडणकार हांचे अध्यक्षते खाला बसका घेतली. ह्या वेळार म्हापशेंचे आदले नगराध्यक्ष सुधीर कांदोळकार, म्हापशेंची आदली नगराध्यक्ष शुभांगी वायंगणकार, गजानन (भाई) नायक, प्रदीप नायक, मुरगांवचे दीपक नायक, शरद चोपडेंकार, अॅड. अनीश बकल, मानस अस्नोडकार, तारक आरोलकार आनी हेर मानेस्त हाजीर आशिल्ले.
हाजीर आशिल्ल्यांच्या प्रस्नांक जापो दिवपाक जायनाशिल्ल्यान अशोक नायक आनी हेरांनी गडबडीन साबार बसका सोंपोवन समाजाचो अपमान केला. जापो दिवपाक जायना जाल्यार कदेल सोडात, असो उलो मारलो. समाजाचे मालमत्तेचेर ताबो घेवपाचो यत्न चल्ला. आतां मेरेन वर्सुकी साबार बसकेंत अशोक नायक आनी हेर पळून गेले, अशे दावे केले. सध्याचे कार्यकारिणीचेर साबार आरोप करतना समाज भावांनी एकवट सांबाळून दवरचो, असो ह्या वेळार उलो मारलो.
साबार बसकेंत घेतिल्ले थाराव
अशोक नायक आनी कार्यकारिणीचेर बसका अर्द्यारूच सोंपयिल्ल्यान तांचे करणेचो साबार बसका निशेध करता. अशोक नायक आनी ताच्या पंगडान फाटल्या स वर्सांत केल्ल्या गैरवेव्हाराची चवकशी करून तांचेर कायदेशीर कारवाय करची. समाज कार्यकारिणीचो पांच वर्सां केल्लो कार्यकाळ अमान्य करप आनी ते निर्णय रद्द करप. बार्देस म्हालांतलें समाज मंदीर अशोक नायक आनी ताच्या पंगडान बेकायदो तरेन हडप केलां. तें समाज मंदीर परतून बार्देस म्हाल समाजा कडेन दिवप. अशोक नायक गटान 2021 त ऑन पद्दतीन जो ताबो घेतला तो साबार बसकेक मान्य ना. अशोक नायक गटान समाजाचे घटनेंत जे बेकायदो बदल केल्यात, ते बदल आयची साबार बसका रद्द करता. 50 वर्सां पिराये वयली व्यक्तीच केंद्रीय समितीचेर वांटेकार जावपाक शकता हो बदल लेगीत रद्द करता. ज्या जाती भावांचे समाज वांगडीपद रद्द केलां, तें तांकां परतून दितात. आयची साबार बसका अशोक नायक आनी पंगडाक कसलीच मान्यताय दिनात.
12 म्हालां खातीर वेंचिल्ले समिती मुखेली
उपेंद्र गांवकार (दिवचल), तारक आरोलकार, संदीप वेर्णेंकार (बार्देस), आकाश गावणेंकार, गोरख केरकार (तिसवाडी), अविनाश शिरोडकार (साश्ट), दिलीप नायक, हनुमंत नायक (फोंडें), विनोद नायक (केपें), दामोदर नायक (सांगें), शरद चोपडेंकार (मुरगांव), उमेश नायक (धारबांदोडें), व्यंकटराय नायक (काणकोण), उमेश तळवणएंकार (पेडणें) आनी शिवदास माडकार (सत्तरी).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
