भांगरभूंय | प्रतिनिधी
प्रकाश वेळीप : समाजाचीं प्रमाणपत्रां दिवपाक आडमेळीं
मडगांव : एसटी समाजा खातीर काम करपी गोमंतक गौड मराठा समाज आनी उटा ह्या संघटणांचेर सरकारानूच बंदी हाडली. हाका लागून समाजाचीं प्रमाणपत्रां दिवपाकूय आतां आडमेळीं येतलीं. राजकी आरक्षण, आदीवासी भवन आनी हेर मागण्यो मान्य करच्यो आनी उपरांत एसटी समाजा कडेन समाजीक नातें सांगचें, अशें समाजाचे फुडारी प्रकाश वेळीप हांणी सांगलें. हें एके तरेचें षडयंत्र आशिल्ल्याचो गंभीर आरोपूय तांणी केलो.
उटा आनी गोमंतक गौड मराठा समाज ह्या संघटणांच्या पदाधिकार्यांनी मडगांवां पत्रकार परिशद घेवन उटा आनी गोमंतक गौड मराठा समाज ह्या संघटणांचेर बंदी घाली आनी ताचो परिणाम पुरायेन समाजाचेर जातलो अशें सांगलें. उटा ही संघटणा आठ संस्थांनी मेळून न्हय, १४ वेवसायीकांनी मेळून निर्माण केल्ली संस्था. युनायटेड ट्रायबल असोसिएशन ह्या नांवान संघटणा स्थापन करपाक गेल्यार ह्या नांवान पयलींच संस्था आशिल्ल्यान अलायन्स हो शब्द तातूंत घालून संस्था स्थापन केल्ल्याचें वेळीप हांणी सांगलें. प्रेरणा दिनाच्या निमतान आयोजीत कार्यावळी उपरांत गोविंद गावडे हांणी समाजाचे प्रस्न मांडले उपरांत तांचें मंत्रिपद काडलें. उपरांत आतां कितलेशेच म्हयने आडकून उरिल्ल्या खटल्यांचेर २७ जून आनी ४ जुलय ह्या दिसा फकत सप्तभरच्या काळांत निकाल दिवन एसटी समाजा खातीर कार्यरत गोमंतक गौड मराठा समाज आनी उटा हे संस्थेचेर सरकारान बंदी हाडली असो दावो प्रकाश वेळीप हांणी केलो. उटा ही फकत गोविंद गावडे हांचे खातीर काम करपी संस्था न्हय. ती एसटी समाजा खातीर कार्यरत आनी घटनेन दिल्ले हक्क मेळोवपा खातीर स्थापन केल्ली संस्था, अशें वेळीप हांणी सांगलें.
स्वातंत्र्यलढ्या वेळारूय कांय फितूर आशिल्ले. तशाच कांय फितुरांक घेवन एसटी समाज संघटणा सोंपोवपाचो यत्न केन्नाच येसस्वी जावपाक दिवचे नात. कांय जाण एसटी समाजा कडेन समाजीक नातें आशिल्ल्याचें सांगतात, अशें आसल्यार राजकी आरक्षणाचो मुद्दो, आदिवासी भवन आनी आदिवासी समाजाच्यो हेर १२ मागण्या अजूनय तश्योच कित्याक आसात, अशें वेळीप हांणी विचारलें. एसटी समाजाक राजकी आरक्षण मेळिल्ल्याचें सांगून भाजपान पेडे वांटिल्ले. भाजपा कडेन राज्यांत आनी संसदेंतूय भोवमत आसतना राजकी आरक्षण विधेयक संमत जावंक ना. येवपी संसदेच्या अधिवेशनांत तें संमत करून घेवचें. एसटी समाजाक राजकी आरक्षण दिवचें आनी मागीरुच समाजीक नातें सांगचें अशें प्रकाश वेळीप हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
