भांगरभूंय | प्रतिनिधी
हिंदी सिने मळा वेले नामनेचे गायक येसुदास हांचो आयज वाडदीस ते निमतान…
आयज 10 जानेवारी हिंदी सिने मळा वेले नामनेचे गायक आनी संगीतकार येसुदास हांचो 85 वो वाडदीस. हिंदी सिने मळार ज्या गायकांनी आपल्या गोड आवाजान म्होर उमठायल्या तातूंत येसुदास हें एक म्हत्वाचें नांव. 10 जानेवारी 1940 दिसा एका मल्याळम ख्रिश्चन कुटुंबांत जल्मल्ल्या येसुदास हांचे बापूय मल्याळम भाशेतले शास्त्रीय संगीतकार आशिल्ले. तांच्या बापाय कडल्यानच तांणी संगीत कलेचें मुळावे धडे घेतले. पिरायेच्या सातव्या वर्सा कोची हांगासरले एके थळावे सर्तींत वांटो घेवन तांणी भांगरापदक जिखलें. कन्नड, मल्याळम, तेलगू आनी तामीळ ह्या दक्षीण भारतांतल्या सगल्या भाशांनी तांणी पदां गायल्यांत, आनी तांणी गायिल्लीं सगलीं पदां हीट जाल्यांत. तांच्या आवाजाचो विदेशी रसिकांचेर लेगीत मोनेळ पडलो.
1965 वर्सा रशियन सरकारान तांकां पदां गावपा खातीर आमंत्रण दिल्लें. गोड, मखलमी आवाज ही येसुदास हांची वळख जाली. तांच्या गोड आनी मखमली आवाजाची किर्ती हिंदी सिने मळा मेरेन पावली ना, हेंच अजाप जावपाचें. संगीतकार सलील चौधरी हांणी तांकां दिग्दर्शक बासू चॅटर्जी हांच्या ‘छोटीशी बात’ ह्या सिनेमा खातीर एक पद गावपाक लायलें. तांच्या आवाजान बासू चॅटर्जी हेवूय प्रभावीत जाले. तांणी तांकां तांच्या सिनेमांत गावपाची ऑफर दिली. 1970 वर्सा सावन तांणी हिंदी पदां गावपाक सुरवात केली. ‘जानेमन जानेमन तेरे दो नयन….’ ह्या पदा उपरांत शांत सज्जन दिसपी अमोल पालेकर हांचे खातीर येसुदास हांचोच आवाज सूट जाता अशें गणीत बॉलिवुडान बांदलें. येसुदास हांच्या गोड आवाजाक लागून खूबशे संगीतकार तांकां पदां म्हणपा खातीर तांचे कडेन रांक लावंक लागले. पूण येसुदास हे पदाची निवड करतना मात विचार करून निवड करताले. येसुदास हांणी फक्त अमोल पालेकर हांचे खातिरूच पादं गायलीं नात जाल्यार अमिताभ बच्चन आनी जितेंद्र हांचे खातिरूय तांणी पदां गायल्यांत. तांणी रवींद्र जैन, बप्पी लाहिरी, खय्याम, राजकमल, सलील चौधरी ह्या संगीतकारां सयत खूबशा सदाबहार हिंदी सिनेमांतलीं पदां गायल्यांत.
तांणी सुमार 45000 पदां गायल्यांत. सद्याचे पद्दतीचीं पदां तांकां आवडनात म्हणून तांणी खूबशा वर्सां सावन पदां गावपाचें बंद केलां. येसुदास हांकां खूबशे पुरस्कार मेळ्ळ्यात. भारत सरकारान तांकां 2002 वर्सा पद्मभूषण हो मानाचो पुरस्कार दिला. जाल्यार केरळ सरकारान तांकां तांची संगीत मळा वेलो सगल्यांत उत्कृश्ट असो ‘स्वाती पुरस्कारम’ ह्या पुरस्कारान भोवमानीत केला. तांकां राष्ट्रीय पुरस्कार लेगीत मेळ्ळ्यात. येसुदास हांणी दक्षीण भाशेंतल्या सिनेमांची निर्मितीय केल्या. येसुदास हांणी गायिल्लीं ‘गोरी तेरा गाव बडा प्यारा’, ‘सुरमई अखियों मे’, ‘दिल के तुकडे तुकडे करके’, ‘जानेमन जानेमन तेरे दो नयन’, ‘चांद जैसे मुखडे पे’ हीं पदां आयजूय लोकप्रीय आसात. येसुदास हांचे चाहते फक्त भारतांतूच आसात अशें न्हय. तांचे संवसारभर चाहते आसात. गोड आनी मखमली आवाजाचे गायक येसुदास हांकां वाडदिसाच्यो हार्दीक शुभेत्सा!
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
