भांगरभूंय | प्रतिनिधी
हालींच्या तेंपार 25 वर्सां पिरायेच्या तरणाट्यांक पसून गोडेंमूत जाता. गोडेंमूत जावपाक जायतीं कारणां आसात, पूण आयज गोडेंमूत जावपाचें मुखेल कारण म्हळ्यार शारिरीक हालचालींचो उणाव. हाचे भायर घरांत शिजयल्लें जेवण उणें खावप, सोरो पियेवप आनी जंक फूड चड सेवन करप. अर्थांत भेसळीचें प्रमाण वाडलां. कश्टाचीं कामां तर लागींलागीं बंद जाल्यांत. गोडेंमूत जावचें न्हय जाल्यार सगळ्यांत पयलीं तुमची जिणे पद्दत बदलची पडटली, बरो आहार घेवचो पडटलो, व्यायाम आनी योग हो तुमच्या जिविताचो म्हत्वाचो भाग करचो पडटलो. पूण गोडेंमूत कशें आडावप आनी ताचीं सुरवातीचीं लक्षणां खंयचीं?
तुमचें वजन चड आसल्यार आनी तुमच्या कुटुंबांतल्या कोणाकूय गोडेंमूत आसल्यार जतनाय घेवपाची गरज आसा, कारण चड वजन आनी चुकीची खावपाची संवय तुमकां ह्या दुयेंसाक कारणीभूत जाता अशें तज्ञ सांगतात. देखून वजन उणें करपाचो यत्न करात, बरें जेवण जेवचें, चड उदक पियेवचें आनी सकाळीं आनी सांजवेळार भोंवपाक वचप. भोंवन येतकच घाम येवपाक जाय, इतलें वेगान चलचें. गजाली मारीत पासय मारल्यार घाम येना.
गोडेंमूताचीं सुरवेकचीं लक्षणां?
दोतोर म्हणटात, गोडेंमूत जावचे पयलींचीं लक्षणां खूब प्रमाणांत दिसतात, जीं खंयच्याय दुयेंतीक खूब उसरां कळूंक शकतात. पूण हें कळटा म्हणसर ताका उशीर जाता आनी तांकां टायप 2 गोडेंमूत जाता. गोडेंमूत जावचे पयलींच्या लक्षणां विशीं उलयल्यार तातूंत भूक वाडप वा उणी जावप, थाकाय येवप आनी चड तान लागप हांचो आस्पाव जाता. परत परत मुतपाकूय जाता.
दादल्यांच्या हार्मोनांचेर परिणाम
दादले आसूं वा बायलो आसूं, गोडेंमूत तांचो हार्मोनाच्या पातळेचेर परिणाम करता. दादल्यांक गोडेंमूत जाता तेन्ना तांची टेस्टोस्टेरोनाची पातळी देंवता, जाल्यार बायलांकय हार्मोनाची पातळी देंवता अशें तज्ञ सांगतात.
दुयेंतींक खंयचीं फळां खावचीं?
गोडेंमूत जाल्ल्या मनशांक सगळीं फळां खावंक मेळटात, पूण तांणी तंतू भरपूर आशिल्लीं फळां चड खावचीं अशें दोतोर सांगतात. संत्र, किवी सारकिलीं हंगामी फळां गोडेंमूत जाल्ल्या दुयेंतींक फायदेशीर आसतात. तेलकट, मसाल्याचें चड खावचें न्हय. गोड मिठायो पसून कमी करच्यो.
कितें टाळचें?
गोडेंमूत जाल्ल्या दुयेंतींक सोरो पियेवंक फावना, तळिल्लें जेवण, तांदूळ आनी बटाट चड खावंक फावना, आंबो, अनस, चिकू सारकिल्लीं गोड फळां चड खावचीं न्हय. एक शीर खावपाक हरकत ना. पूण न्हिदपाच्या वेळार हें खावचें न्हय. कारण हालचाल जावंक ना जाल्यार ताचो परिणाम कुडीचेर जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
