भांगरभूंय | प्रतिनिधी
हे जे आज सगले चाळीस आमदार आसात तांतले दोन वा चडांत चड चार इतलेच आमदार आसतले आशिल्ले!
गोवा क्रांती दिसा, 18 जुनाक मुख्यमंत्री डाॅ. प्रमोद सावंत हांणी भारत स्वतंत्र जातकूच गोंय मुक्त करपाक 14 वर्सां कळाव केलो ही आपली हालींची म्हणचे या दोन- तीन वर्सांची टेप परत एक फावट वाजयली. अर्थात, ती कोणेंच गंभीरपणान घेवची न्हय. तांकां सद्दां दिसभर कार्यावळी करपाच्या ओगांत अभ्यास करपाक वेळ मेळना दिसता.
भाजपवाल्यांक कितें म्हूण कोण जाणा, पुस्तकां बी वाचपाची संवयूच ना. तांचें निजाचें पुस्तक म्हणल्यार प्रधानमंत्री नरेंद्र मोदी. मुद्दम विचार करून पळयात. दोन- तीन वर्सां आदीं मुख्यमंत्री ह्या विशयाचेर केन्नाच उलोवंक नात. एकदम जागे जाल्ले भशेन ते ह्या विशयाचेर उलोवपाक लागले. पूण केन्ना ? जेन्ना नरेंद्र मोदी एक दीस ह्या विशयाचेर उलयले त्या दिसाच्यान ! म्हाका अशें निखालस दिसना की डाॅ. सावंत बेठेच अशें कितें उलयत म्हूण! अशेंय आसपाक शकता की तांकां खबर आसा, नेहरूचे आड कितेंय उलयत तर फुडले फावटीचें ताचें मुख्यमंत्रीपद सुगूर.
हे निमतान आनीक एके गजालीचो उगडास जाता. कांय म्हयन्या आदीं वा एक वर्स लेगीत जाल्लें आसत! एक दीस अचकीत केरळचे राज्यपाल आनी आमचे गोंयकार, राजेंद्र आर्लेकार हांणी 60 वर्सा पयलीं ‘अजीब है ये गोवाके लोग’ अशें पं. जवाहरलाल नेहरू हांणी म्हणिल्लें ताचेर टिप्पणी केली. हरशी नेहरू तें अशेंच उलोवन गेल्ले. तें आयकुपाचें आनी विसरपाचें, मागीर आर्लेकार हांणी ताचेर मुद्दम टिप्पणी कित्याक केली? अशें बी आसूंक शकता की तांचो राज्यपाल पदाचो कार्यकाळ सोपूंक आयला. आनी मोदींच्या काळांत नेहरूचेर कितेंय थोमणो मारलो की आपली फुडारांतली जीण सुगुर करपाक तें माथ्या वयल्यान पुरो म्हूण बी!!
हरशी, भारत सरकारान गोंयांत लश्कर भारत स्वतंत्र जातकूच चवदा वर्सांनी धाडलें, ताका दुसरीं खूब कारणां आसात. तें आसूं. न्हिदिल्ल्याक उठोवप सोपें, जागे आशिल्ल्यांक कोण उठोवंक शकतलो ? स्वातंत्र्या वेळार भारतांत विरोधी पक्षांत खूब मोठे- मोठे फुडारी जावन गेले. लोहिया, नाथ पै, मधू दंडवते, मृणाल गोरे, जयप्रकाश नारायण, आचार्य नरेंद्र देव, एस. एम. जोशी, नानासाहेब गोरे, श्यामाप्रसाद मुखर्जी, जॉर्ज फर्नांडीस आनी जायते. पूण ते ह्या विशयाचेर केन्नाच उलोवंक नात. ह्याच वयल्यान तेन्नाची परिस्थिती कितें आशिल्ली हाचो आमच्यांनी अदमास काडपाक जाता. नरेंद्र मोदी हांचें सोडून दियात. तांकां आतां तें संवयेचेर पडलां. घडये आपूण चुकून खरें तें उलयल्यार तांचें तांकांच तें फट बी दिसता आसुये. पूण तें सोड. आमचो मुखेलपणान बरोवपाचो आजचो विशय तो न्हय.
हांव स्वता भारत स्वतंत्र जातकूच चवदा वर्सां उपरांत गोंय स्वतंत्र जालें देखून खूब खोशी आसां. जालां तें बरेंच जालां. समजात की गोंय 1947 ते 1950 हे मजगतीं स्वतंत्र जाल्लें तर कितें जातलें आशिल्लें ? 1950 ते 1960 घ्या वर्सांनी आमचे कडेन खडेगांठ अशे कोंकणी चळवळी नाशिल्ले. ह्या काळांत रवींद्र केळेकार, मनोहरराय, चंद्रकांत केणी, उदयबाब, शंकर भांडारी, शाबू देसाय, उल्हास बुयांव, नागेशबाब, गुरुनाथ केळेकार हे तितले तयारेंत नाशिल्ले. क्रिस्तांव समाज आनी हिंदू लोक जांची आपले आपूण धारणा आशिल्ली की गोंय वेगळें उरपाक जाय ते सोडल्यार बाकीचे हिंदू खुशाल बेफिकीरपणान गोंय महाराष्ट्राच्या ताळ्यांत घालतले आशिल्ले. आनी मागीर कोंकणात सध्या जें घडटा तशें कोंकणीचे बाबतींत गोंयांत घडटलें आशिल्लें. कोंकणी भाशा घरांत उलोवपा पुरती उरतली आशिल्ली.
मागीर केरळांतली कोंकणी, कर्नाटकांतली कोंकणी, सगल्यो कोंकणी मरून वतल्यो आशिल्ल्यो, कोंकणींत साहित्य जन्माक येवचें नाशिल्लें. कोंकणींत नाटकां जावचीं नाशिल्लीं. गोंयकारांक साहित्य अकादेमीचे पुरस्कार मेळचे नाशिल्ले. येद्या व्हडले मराठीक चार ज्ञानपीठ पुरस्कार मेळ्ळ्यात तर येद्येशे कोंकणीक दोन. कोंकणीक सरस्वती सम्मान मेळ्ळा. हें सगलें सगलें कांयच मेळचें नाशिल्लें.
इतलेंच न्हय, जाल्यार पर्रीकार, श्रीपाद, प्रमोद हे केन्नाच केंद्रीय मंत्र्याचो वा मुख्यमंत्रीपदाचो सोपूत घेवपाक पावचे नाशिल्ले. ते चडांत चड खंयचेय नगराध्यक्ष वा सरपंच, इतलेच जातले आशिल्ले. तेंडुलकार, तानावडे, दामू हे, राज्यसभेचे सभासद वा पक्षाचे अध्यक्ष जावंक पावचे नाशिल्ले. तांणी फक्त वेंचणुकेंत हांगा थंय बोवाळपाचें इतलेंच तांच्या नशिबांत आसतलें आशिल्लें, गोंयचे तीन, चार बी आमदार आसतले आशिल्ले. म्हणटकूच आज इतले जे आमदार आसात तांची अवस्था कितें जातली आशिल्ली कोणाक खबर ! तांणी मागीर फक्त भजन करपाचें! मागीर आमचे असले जे मात- मात बरयतात आनी जे माहितीक ‘म्हायती’ म्हणटात, पाहिजेक ‘पायजे’ म्हण्टात आहेक ‘हाअे’ म्हणटात, मराठीक ‘मराटी’ म्हणटात तांचें बाबड्यांचें कसले हाल जातले आशिल्ले काय?
आजचीच परिस्थिती लक्षांत घेतली जाल्यार प्रमोद, विश्वजीत, मावीन, रवी, सुभाश, रोहन, बाबूश, निळकंठ, सुभाष, आलेक्स हे मंत्री आसतले आशिल्ले? इतलेंच न्हय जाल्यार प्रवीण, जोशुआ, डेलिया, केदार, मायकल, जेनिफर, रुदोल्फ, राजेश, प्रेमेंद्र, देविया, संकल्प, कृष्णा, दिगंबर, उल्हास, निलेश, रमेश हांकां आपूण केन्ना मंत्री जातलो काय? ही दुगदुग आसतली आशिल्ली? हे जे आज सगले चाळीस आमदार आसात तांतले दोन वा चडांत चड चार इतलेच आमदार आसतले आशिल्ले! मागीर बाकींच्या बाबड्यांचें कितें? तांचो संवसार कसो चलतलो आशिल्लो? तांबड्या दिव्याची गाडी तांकां कशी मेळटली आशिल्ली? गोविंद मागीर आदिवासी कल्याण खात्यांत भ्रश्टाचार हें उलोवंक पावचो नाशिल्लो आनी मुख्यमंत्री ताका काड्रंक शकचो नाशिल्लो. विश्वजीत मॅडिकल कॉलेजांत वचून दोतोराक तापोवंक शकचो नाशिल्लो. कारण कला अकादमीचो, मेडिकल कॉलेजाचो मंत्री हे कोण तरी महाराष्ट्रीय आसतले आशिल्ले!
चलता तो सगलो नियाळ करतकीर एकूच सार वयर सरता तो म्हणल्यार 1947- 48 त जर गोंय स्वतंत्र जाल्लें तर खातरेन 14 वर्सां पयलीं आमी देशा भायले परकी सत्ते कडच्यान मुक्त जातले आशिल्ले! पूण आमकां फुडले सगलें जिवीतभर देशा भितरल्या परकी सत्तेवांगडां दीस काडचे पडटले आशिल्लें ताचें कितें? पुर्तुगीजानी आमचेर पयलींच 436 वर्सा राज्य केल्लें. आनीक चवदा वर्सां केलें म्हूण अशें कितें व्हडलें बिगडलें? पूण आतां आमी आमची भाशा, आमची अस्मिताय, आमची संस्कृती तिगयतात आनी आमीच आमचेर आमचे पासत राज्य करतात. ताचे परस दुसरें व्हडलें परमभाग्य तें कितें?
– अरविंद काकोडकार,
चिखले
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
