गोंय हें गोंय उरचें!!

भांगरभूंय | प्रतिनिधी

ह्या आनी हेर राजांच्या बऱ्या- बऱ्या गजालींचो वापर आमी समाजाच्या उत्कर्शा खातीर करपाक शकनात?

इतिहास हो इतिहास आसता. घडणुकांची काणी. तुस्त वा दोशाची. इतिहासा पसून आमी शिकपाक जाय. तातूंतल्या वायट गजालींची पुनरावृत्ती जावची ना, हाची जतनाय घेवंक जाय. कोणाच्याच फायद्या खातीर ताचो वापर जावंक जायना. अमेरिकन इतिहासकार हेन्री स्टीले कोमगार म्हणटात, ‘इतिहास हो अपघात, चुको, अजापां आनी विचित्र गजालींचो एक घुस्पागोंदळ कसो आनी आमचें ते विशींचें गिन्यानूय तशेंच. पूण आमकां तो कोणाक सांगपाचो आसल्यार ताची बारीकसाणेन चिकित्सा करपाक जाय.’ ब्रिटीश इतिहासकार एडवर्ड हालेट कार म्हणटात, ‘इतिहासीक घडणुको, तथ्यांचो अभ्यास करचे पयलीं इतिहासकारांचो अभ्यास करात.’ शुक्रारा रातीं ज्येश्ठ साहित्यकार, आदले आमदार उदय भेंब्रे हांच्या एका व्हिडियोंतल्या कांय विधानांक आक्षेप घेवन बजरंग दलाच्या कांय वावुरप्यांनी रातच्या 10 वरांचेर तांच्या घरा वचून वाद घालो. ह्या प्रसंगाचोय व्हिडियो आसा. तातूंतली भाशा, उलोवपाची पद्दत आक्रमक, अपमानास्पद आशिल्ली. हे घडणुकेचो सगल्यानीच निशेध केलो. तातूंत राजकी, समाजीक फुडारी, पत्रकार, कोंकणी चळवळींतले वावुरपीय आशिल्ले. काल मडगांवां सभाय जाली. तातूंत समाजांतल्या एका ज्येश्ठ नागरिकाच्या घरा रातचे वचून ताका अशे तरेन वागणूक दिवप्यांचेर कारवाय करची, अशी मागणी जाल्या. हें आंदोलन शांत जावचें हे खातीर आतां सरकारी यंत्रणेन कायद्यान कितें तीं पावलां मारपाक जाय. कारण गोंय हें गोंय उरपाक जाय. हांगाचो एकचार, भावपण तिगपाक जाय. हेर राज्यांनी रोखडोच जातीय, धर्मीक तणाव जाता, चूक काय बरोवर हें पळयनासतना सगलेच न्यायाधीश जातात, हम करेसो कायदा पद्दतीन वागतात…. हें असलें आमच्या सुशिक्षीत गोंयांत नाका.
‘छावा’ सिनेमा येत सावन छत्रपती संभाजी महाराजां विशीं सोशल मिडियाचेर विचारांची (?) घुसळण चल्ल्या. आतां सगलेच सोशल मिडियाचेर आसतात, ताका लागून समाजीक तणाव जावचो ना, हाची जापसालदारकी घेवपाचें काम सरकारी यंत्रणांचें. कमेंटांक जातीय, धर्मीक रंग आयला. कथीत उच्च वर्णीय आड भोवजन समाज असो संघर्श उक्तेपणी चालू आसा. संभाजी राजांच्या विरोधांत तांच्याच लागींच्या सोयऱ्यांनी फितुरी केली, अशें थोडे इतिहासकार म्हण्टात. तशें जावंक ना, ही फितुरी महाराजांच्या चिटणीसांनी (कथीत उच्च वर्णीय) अशें हेरांचें मत. एकमेकांक धमक्यो, बुरशीं उतरां दिवपूय चालू जालां. शिवाजी महाराज, संभाजी महाराज हांकां हिंदू धर्माचो अभिमान आशिल्लो. पूण तांणी केन्नाच दुसऱ्या धर्माचो, जातीचो दुस्वास केलो ना. तशें उदाहरण खंयच मेळना. पुर्तुगेज कारागीर, मुस्लिम सरदारांचें साह्य तांणी स्वराज्य उबारपाक घेतलां. तांणी गुलामगिरीचेर बंदी हाडिल्ली. मोकाशे, वतनां दिवप बंद केल्लें. गरिबांक लुबाडप्यांक ख्यास्त केल्ली. ताकाच लागून बरेच सरदार तांचेर बेजार आशिल्ले जावंये. दोगूय दूरदिश्टीचे फुडारी. तांचे जिणे पसून आदर्श घेवंक जाय. जातीय, धर्मीक, पक्षीय फायदो कसो मेळटलो, हाचो विचार केल्यार तें ह्या मळबायेदे उंचायेच्या राजांक ल्हान करपा सारकें थारचें ना?
इतिहासकारांनी संशोधन केलां. पुस्तकां बरयल्यांत. ह्या दोनूय राजांच्या जिवीताचेर तांच्या काळांतल्या देशी, विदेशी लेखकांनीय बरोवन दवरलां. पत्रां आसात. इतिहासांतलें आपल्याक फायद्याचें तितलेंच घेवन ताचें भांडवल करप, दुसऱ्यांक तुच्छ लेखप कितलें योग्य? पांचशें वर्सां आदल्यो घडणुको वापरून आयचें समाजमन दुशीत, संभ्रमीत करप चुकीचें न्हय? त्या काळा वयल्यो प्रथा, पद्दती, परिस्थिती, समाज वेगळो आशिल्लो. ह्या आनी हेर राजांच्या बऱ्या- बऱ्या गजालींचो वापर आमी समाजाच्या उत्कर्शा खातीर करपाक शकनात? तांचो आदर्श घेवपाक शकनात? गोंयांत बेकारी, भ्रश्टाचार वाडला, जमनी विकप चालू आसा, बायलांचेर अत्याचार जातात, गुन्यांव, अपघात वाडल्यात, भेसळ तर सदचीच, सुवार्थ तेंगशेर पावला, पर्यावरणाचो नाश जाता, दुस्वास वाडला… हांव छत्रपतीचो परम भक्त. हांव हातूंतलें कांयच करचो ना, असो सोपूत घेवन ते प्रमाण वागप आमकां जमतलें?
देशांत लोकशाय आसा. संविधाना प्रमाण कारभार चलता. सगल्यांचेच विचार पटपाकूच जाय, अशें ना. आपलेच विचार खरे, तेंच सगल्यांनी मानपाक जाय, अशेंय ना. कारण तितलें विचार स्वातंत्र्य ह्या म्हान देशांत सगल्यांक आसा. उदय भेंब्रे हांचे विचार पटूंक नाशिल्ले जाल्यार ताचेर व्हिडियो काडूं येताले, लेख बरोवं येताले, सोशल मिडियाचेर व्यक्त जावं येताले. कोर्टांत वचूं येतालें. पूण तांच्या घरा कडेन, तेंय बी रातच्या वेळार वचून अशें वागप कायद्यांत बसता? संविधानाचेर घालोच घाल्ले बशेन तें जालें ना? वेळ, काळ, पिराय, मनीस कोण तें पळयनासता चोंबेंच्या चोंबे करून घरांनी वचून वाद घालप हें कायदो आनी सभ्यते भायलें. धमकायल्यार, हल्लो केल्यार ‘मोनी बाबडीं कोणूय आमडात’ अशी जनता तयार जातली असें बी कोणाक दिसता? उरफाटो कोणे उठून संघर्श केलो जाल्यार समाजांत फूट, अशांतताय, तेढूय निर्माण जावं येता. महासत्तेचें सपन पळोवपी आमच्या देशाक परवडटलें मूं हें?