गोंय स्वयंपूर्ण करपाक शेतकार म्हत्वाचो

भांगरभूंय | प्रतिनिधी

मुख्यमंत्री : गोंयांत बेगिनूच सुरू करतले अ‍ॅग्रो क्लिनीक

भांगरभूंय । प्रतिनिधी

दिवचल : हरीत आनी धवल क्रांती वांगडाच गोंय स्वयंपूर्ण करपाक शेतकार हो म्हत्वाचो घटक आसा. गोंयांत बेगिनूच अ‍ॅग्रो क्लिनीक सुरू करतले. गोंयांतल्यो पडीक जमनी लागवडी खाला हाडचे कातीर तरणाट्यांनी समूह शेतीचो मार्ग आपणावचो आनी सेंद्रीय पद्दतीन शेतां कसून स्वयंपूर्ण गोंयचो ध्यास प्रत्यक्षात हाडचे खातीर वावुरचें, अशें मुख्यमंत्री डॉ. प्रमोद सावंत हांणी सांगलें.

सांखळे दोन दिसांच्या गिरायक विक्रेता मेळाव्याचें उक्तावण केले उपरांत मुख्यमंत्री उलयताले. ह्या वेळार माचयेर आमदार प्रेमेंद्र शेट, संचालक संदीप फळदेसाय, किशोर भावे, गोपाळ सुर्लीकार, महेश सावंत, सिद्धी प्रभू पोरोब, शंकर चोडणकार, विजयकुमार नाटेकार, निलिमा गांवस चंद्रहास हाजीर आशिल्ले.

आयज कृशी मळार कोटींची उलाढाल जाता. गोंय स्वयंपूर्ण जावप गरजेचें आसा. फलोत्पादन मंडळ देश पांवड्यार आदर्श संस्था म्हूण वावर करता. व्हड प्रमाणार थळावी भाजी विक्री करून शेतकारांक लाखांनी रुपयांचो फायदो मेळोवन दिवपांत योगदान दिलां, अशें मुख्यमंत्र्यान सांगलें. आपल्यो जमनी पयशांचे आसेन रसायन वा कावलां अड्ड्यां खातीर दीवं नाकात. स्वता कश्ट करून हरीत क्रांती करात, अशे कळकळीची विनवणी तांणी शेतकारांक केली.

कृशी संचालक संदीप फळदेसाय हांणी येवकार दिलो. ह्या मेळाव्याचो उद्देश तांणी स्पश्ट केलो. तशेंच कृशी विकास येवजणे खाला सेंद्रीय शेती करपा खातीर आशिल्ल्या विवीध येवजण्यांची म्हायती दिली.

नव्यो येवजण्यो आंखतना अर्थीक कणो घट करपाक शेतकारांक समृद्ध करपाची गरज आसा. पुर्वजांच्या शेतीक चालना दितना कृशी पर्यटनाचेर भर दिवप गरजेचें आसा, अशें प्रेमेंद्र शेट हांणी सांगलें. ह्या वेळार शेतकी स्टॉलांक मुख्यमंत्र्यान भेट दिवन पळोवणी केली. तशेंच सगळ्यां कडेन संवाद सादलो. दोन दिसांच्या मेळाव्यांत विवीध तज्ञ मार्गदर्शन करतले, तशेंच विवीध येवजण्यांची लेगीत म्हायती दितले.

फार्म हावसाक अनुदान दिवपाचो सरकाराचो विचार

कृशी पर्यटनाक चालना दितना फार्म हावसाक अनुदान दिवपाचो सरकाराचो विचार आसा. केंद्र सरकारान कोटींनी रुपयांच्यो येवजण्यो युवाशक्तीक शेतां वटेन वळोवचे कातीर चालीक लायल्यात. गोंयांत बेगिनूच अ‍ॅग्रो क्लिनीक सुरू करतले. शेतकारांक 5 लाख रुपया मेरेन 4 टक्के व्याजांत रीण उपलब्ध करून दितात. देवस्तान समित्यो तशेंच कोमुनिदादीन शेती उदरगती खातीर आपल्यो जमनी उपलब्ध करून दिल्यो जाल्यार समूह शेती खातीर बरे तरेन ताचो वापर करचे करपाक सरकार सगळे ते यत्न करपाक बांदील आसा, अशें मुख्यमंत्री डॉ. प्रमोद सावंत हांणी सांगलें.