भांगरभूंय | प्रतिनिधी
पणजी ः गोंय सायबर सुरक्षीत करपा खातीर पुलीस प्रशासन, प्रसार माध्यमां आनी हेर भागधारकांनी चड जागृताय निर्माण करपाची गरज आसा अशें मत पुलीस महासंचालक आलोक कुमार हांणी उक्तायलें. बुधवारा गोंय श्रमिक पत्रकार संघटने वतीन आयोजीत केल्ले सायबर सुरक्षा कार्यशाळेंत ते उलयताले. ह्या वेळार पुलीस उपमहानिरिक्षक अजय शर्मा, वर्षा शर्मा, पुलीस अधीक्षक राहुल गुप्ता आनी पुलीस निरिक्षक दीपक पेडणेकार हाजीर आशिल्ले.
फाटल्या कांय वर्सांत राज्यांत सायबर गुन्यांव वाडत आसात. सायबर गुन्यांवांक लागून देशभरांत दर वर्सां 25 हजार कोटी रुपयांची फटवणूक जाता. जाल्यार गोंयांत अशा गुन्यांवांतल्यान दर दिसा लाखांनी रुपयांची फटवणूक जाता. अशा गुन्यांवांचेर आळाबंदा हाडपाचो यत्न पुलीस प्रशासन करता. हे खातीर आमी फाटल्या स म्हयन्यांत खात्या खाला खाशेले यत्न सुरू केल्यात. प्रसार माध्यमांनी आनी हेर भागधारकांनीय अशेंय यत्न करचे अशें आलोक कुमार हांणी सांगलें.
तांणी मुखार म्हणलें, सायबर गुन्यांव कशे जातात, फटवणूक कशी करतात, तें कशें टाळचें, कागाळ खंय दाखल करची हाची म्हायती गोंयच्या दरेका नागरिका मेरेन पावोवप हो आमचो हेत आसा अशें तांणी सांगलें. सोशल मिडिया वा हेर माध्यमांतल्यान गोंय पुलीस हे बाबतींत जागृताय मोहीम चलयतात. हे खातीर राज्य प्रसार माध्यमांनी गोंय पुलिसां वांगडा मेळून काम करपाक जाय. अशें जालें जाल्यार ह्या वर्साच्या निमाणे मेरेन सायबर सुरक्षीत गोंयचें ध्येय साध्य जावंक शकता.
सायबर गुन्यांवकार लोकांचो निश्काळजीपण, लोकांक हांयस दाखोवन वा भंयाचेर आदारून गुन्यांव करतात. बनावट गुंतवणूक अॅप्स, डिजिटल अरेस्ट, सेक्सटॉरशन, सोशल मिडियाचेर बनावट प्रोफायल, बनावट नोकरी दिवपाचे हांयस, बनावट रिणाचे अॅप अशा वेगवेगळ्या पद्दतीन लोकांची फटवणूक जाता. हे खातीर लोकांनी जागृत रावपाची गरज आसा. तशेंच वैयक्तीक म्हायती कोणाकूच दिवप ना आनी मेळपी संदेशाची अधिकृतताय तपासप म्हत्वाचें अशें पुलीस निरीक्षक दीपक पेडणेकार हांणी सांगलें.
85 बनावट वेबसायटी बंद
सायबर गुन्यांवकार केन्ना केन्ना लोकांक अर्थीक फटोवपा खातीर बनावट वेबसायटी तयार करतात. ह्यो वोबसायटी अधिकृत वेबसायटीं सारक्यो आसात. पूण ह्या वेबसायटींच्या युआरएलांत स्पेलिंग चुकीचें आसता. गोंय पुलिसांनी फाटल्या कांय म्हयन्यांत अशीं 85 बनावट वेबसायटी बंद केल्यात अशें राहुल गुप्ता हांणी सांगलें.
म्हत्वाचे मुद्दे
० सेबीच्या संकेतथळार गुंतवणूक अॅप वा गुंतवणूकदाराची अधिकृतताय तपासात.
० डिजिटल अरेस्टांत फटोवपी मनशाक नांव, पद, बॅच क्रमांक अशी म्हायती विचारची.
० रिणां दिवपी अॅपाची अधिकृतता आरबीआयच्या संकेतथळार तपासात.
० .gov.in वा .nic.in वा https:// आशिल्लीं वेबसायटी वापरच्यो.
० सायबर फटवणूक जाल्यार 1930 वा 7875756222 ह्या नंबराचेर संपर्क करचो.
० सोशल मिडियाचेर तुमची सुवात कळटली अशें फोटो घालूं नाकात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
