भांगरभूंय | प्रतिनिधी
अरूण सिंग: नव्या मंडळ अध्यक्षांनी नेटान काम करचें
पणजी: प्रधानमंत्री नरेंद्र मोदी हांच्या फुडारपणा खाला केंद्रांतलें भाजपा सरकार जे पद्दतीन पुराय देशाचो विकास सादत आसा, तेच पद्दतीन मुख्यमंत्री डॉ. प्रमोद सावंत हांच्या फुडारपणा खाला गोंय सरकार राज्यांत तोखणायेची कामगिरी करीत आशिल्ल्याचें भाजपाचे राष्ट्रीय सरचिटणीस अरूण सिंग हांणी म्हणलें.
36 मतदारसंघांतल्या नव्या मंडळ अध्यक्षांच्या भोवमाना खातीर प्रदेश भाजपा कडल्यान सोमारा पणजेंत आयोजीत केल्ले कार्यावळींत ते उलयताले. ह्या वेळार मुख्यमंत्री डॉ. प्रमोद सावंत, राज्यसभा खासदार तशेंच भाजप प्रदेशाध्यक्ष सदानंद शेट तानावडे, सरचिटणीस नरेंद्र सावयकार, दामू नायक आदीं मानेस्त ह्या वेळार हाजीर आशिल्ले.
36 मतदारसंघांनी वेंचून आयिल्ले मंडळ अध्यक्ष हे संवसारांतल्या सगल्यांत मोट्या पक्षाचे मंडळ अध्यक्ष आसात. हाचें भान दवरून फुडारांत तांणी काम करप गरजेचें आसा. गोंयांतल्या भाजप वांगड्यांचे नोंदणेंत ह्या वेळार व्हड संख्येन वाड जाल्या. पक्षाचे कार्यकर्ते प्रामाणीकपणान काम करीत आसात. ताका लागून 2027 चे विधानसभा वेंचणुकेंत गोंयांत परतून एकदां भाजपाचेंच सरकार स्थापन जातलें असो ठाम विस्वासूय तांणी उक्तायलो.
————–
बॉक्स
पक्षाच्या धोरणाक लागून तरणाट्यांक संद: तानावडे
केंद्रीय फुडारपणान ह्या वेळार मंडळ अध्यक्षपदाचे वेंचणुकेंत देशभर पिरायेच्या मर्यादेची अट घाल्ली. गोंय ल्हान राज्य आशिल्ल्यान तातूंतल्यान सूट मेळची अशी मागणी आमी पक्षा कडेन केल्ली. पूण पक्षाच्या धोरणा प्रमाण निवड करपाचें निश्चीत जालें. ताका लागून मंडळ अध्यक्षपदार तरणाट्यांक संद मेळ्ळी अशें सदानंद शेट तानावडे हांणी म्हणलें. खूबशा मतदारसंघांनी मंडळ अध्यक्षपदा खातीर खूबशीं नांवां आशिल्लीं. तरी लेगीत सगल्याच मतदारसंघांनी बिनविरोध निवड जाली अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
