भांगरभूंय | प्रतिनिधी
पणजी ः पणजेच्या मध्यवर्ती वाठारांत संरक्षण खात्याची सुवात गोंय सरकाराक मेळची हे खातीर मुख्यमंत्री डॉ. प्रमोद सावंत हांणी संरक्षण मंत्री राजनाथ सिंग हांची दिल्लींत भेट घेतली. मंत्री राजनाथ सिंग हे विशीं सकारात्मक आसात आनी ही सुवात बेगीनूच गोंय सरकाराक मेळटली अशी आस्त मुख्यमंत्र्यान उक्तायली. मंगळारा बँकां खातीर आयोजीत कार्यशाळेचें उक्तावण केले उपरांत तांणी प्रसार माध्यमां कडेन संवाद सादलो. पूण हे खेपे तांणी मंत्रीमंडळ फेरबदलाचेर कसलीच प्रतिक्रिया दिवंक ना.
दिल्लींत वेगवेगळ्या केंद्रीय फुडाऱ्यांक मेळून गोंय संबंदीत वेगवेगळ्या विशयांचेर चर्चा जाली. उद्देग मंत्री पीयूष गोयाल हांचे कडेन गोंयांत ‘अपेडा’ (कृशी आनी अन्न उत्पादन निर्यात आनी उदरगत प्राधिकरण) आनी केंद्रीय उद्देग मंत्रालयाचे गोंयांत क्षेत्रीय कार्यालय सुरु करपा विशीं चर्चा जाली. हे संबंदी आमचे यत्न चालू आसात आनी बेगीनूच हीं कार्यालयां उक्तीं जातलीं. हीं कार्यालयां उक्तीं केल्यार गोंयच्या उद्देगीक मळार आनी वेपाऱ्यांक फायदो जातलो अशें मुख्यमंत्र्यान सांगलें.
हाचे भायर होंडा हेलिकॉप्टर दुरुस्तीचो प्रकल्प बेगीन सुरू करपा विशीं चर्चा जाली. हो प्रकल्प गोंयां खातीर म्हत्वाचो आसा आनी ह्या प्रकल्पाक लागून गोंयांत रोजगार मेळटलो. केंद्रीय गृहमंत्री अमित शाह हांणी राज्याच्या राजकी आनी हेर विशयांचेर आमकां सदांच मार्गदर्शन केलां. हे खातीर हांव आनी आमदार मायकल लोबो काल दिल्लींत तांकां मेळ्ळे. ह्या वेळार तांचे कडेन राजकी घडामोडीं सयत वेगवेगळ्या विशयांचेर चर्चा जाली अशी म्हायती मुख्यमंत्र्यान दिली.
आलेक्स सिक्वेरा हांकां बेगीनूच डिस्चार्ज
दिल्लींत आमी मंत्री आलेक्स सिक्वेरा हांकांय मेळ्ळे. सध्या तांची भलायकी बरी आसा. फुडल्या चार-पांच दिसांत तांकां डिस्चार्ज दितले अशी म्हायती मुख्यमंत्र्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
