भांगरभूंय | प्रतिनिधी
अामी गोंयकार खूब भावार्थी. बरेच गोंयकार देवदर्शना खातीर पयसुल्ल्या थळांचेर वतात. शिर्डी, नरसोबाची वाडी, गाणगापूर, कुरवपूर, पंढरपूर, सौंदत्ती… कितलीं नांवां घेवचीं? फक्त हिंदूच न्हय, तर क्रिस्तांव भाविकूय वेलंकिणी, मुस्लिम भावीक अजमेराक बी वतात. अक्षरधाम, राम मंदीर, वैष्णोदेवी, काशीय वचपी शेंकड्यांनी गोंयकार आसात. मात थंय गेले काय तांकां रावपाची वेवस्था करतना त्रास, मनस्ताप जावं येता. कांय जाणांक जाताय बी. हालींच गोंय सरकारान वेलंकिणी, कुंभमेळ्या खातीर खाशेल्यो रेल्वे सोडिल्ल्यो. हजारांनी लोकांक सोंपेपणी थंय वचपाक मेळ्ळें. समाजांत ताण, तणाव वाडिल्ल्यान मनशांती खातीर भावीक देवाच्या सोदांत पयस पयस वता. ताचे मदलो परोपकार, दया, मोग, समाजा विशीं आदर, प्रामाणीकपण वाडटा. तो उजू मार्गाचेर चलता! समाजीक नदरेन कितली म्हान गजाल ही. ते खातीर धर्मीक पर्यटनाक चड वाव दिवंक जाय.
दोगां आमदारांनी काल धर्मीक पर्यटना विशीं विधानसभेंत बरी सुचोवणी केली. वेलंकिणी (नागापट्टणम- तमीळनाडू) शारांत सरकारान जागो घेवन भक्तां खातीर गोवा सदन उबारचें, पंढरपूराकूय (सोलापूर- महाराष्ट्र) रावपाची वेवस्था करची. वारीक नेमान वचपी भक्तांक म्हाप्रसाद आनी हेर सुविधां खातीर अर्थीक मजत करची ह्यो त्यो दोन सुचोवण्यो. सरकारान, खास करून पर्यटन खात्यान हाचेर विचार करपाक जाय. कारण दरवर्सा हजारांनी गोंयकार भक्त ह्या थळांचेर वतात. फाटल्या 7- 8 वर्सांनी तर पंढरपूराक वचपी वारींनी व्हडली वाड जाल्या. वेलंकिणीय आॅगस्टांत जावपी फेस्ताक भक्त वतात. ह्या थळांचेर तांची जेवपाची, न्हावपाची, रावपाची गैरसोय जावपाक जायना, हे खातीर सरकारान सुसज्ज अशीं गोवा सदनां उबारपाक जाय. सौंदत्ती, आदमापूर (कोल्हापूर), शेगांव, कोल्हापूर, अजमेर अशा जाग्यांचेरूय ल्हान प्रमाणांत कांय जायना, पूण गोंय सदन, गोंय भवन जावंक जाय. सध्या मुंबय, दिल्लींत तें आसा.
कांय राज्यांची म्हत्वाच्या शारांनी सरकारी भवनां आसात. थंय आमदारांक, अधिकाऱ्यांक रावपाक मेळटा. कामाक लागून वचपी लोकांकूय सवाय भितर थंय रावंक दितात. दिल्लींतलें गोवा सदन सगल्यांक खबर आसा. मुंबयंतूय गोवा सदन आसा. भक्तां खातीर गोंय सदनां बांदतनाच तातूंत विद्यार्थ्यांक, दुयेंतींच्या घरच्यांकूय रावपाची परवानगी दिवची. जंय उच्च शिक्षण मेळटा (बंगळूर, सुरतकल, बेळगांव, कोल्हापूर, चेन्नय….) थंयूय खास विद्यार्थ्यां खातीर निवासी इमारती बांदू येतात. कारण व्हडल्या शारांनी पेईंग गेस्ट वा बिराडाक रावप सगल्यांकूच परवडटा अशें ना. शिक्षणा खातीर रावपाची सुविधा तयार केल्यार, भायर वचून शिकपी विद्यार्थ्यांचो आंकडोय वाडटलो. युपीएससी परिक्षेच्या अभ्यास, मार्गदर्शना खातीर युपी, बिहार, एमपीचे भुरगे वाराणसी, कानपूर, लखनौ, अलाहाबाद वतात. थंय ट्यूशन घेतात. प्राध्यापकांचें मार्गदर्शन घेतात. थंय तांकां बिराडाक रावचें पडटा. अशा थळांचेर धाकटुलेशें गोंय भवन जायत जाल्यार गोंयकारांक थंय रावन शिकपाक मेळटलें.
आयज दुयेंतींचो आंकडोय वाडला. रक्तदाब, गोडेंमूत तर पिरायेची चाळिशी हुपिल्ल्या सगल्यांकूच आसा. ताचे भायर हेर व्हडलीं दुयेंसां वाडल्यांत. तांकां उपचारा खातीर दिल्ली, केरळ, कर्नाटक, महाराष्ट्रांत फावटी मारच्यो पडटात. अश्या दुयेंतींक, तांच्या घरच्यांक गोवा सदनां बऱ्याक पडटलीं. हें खूब व्हडलें समाजकार्य थारतलें. मुंबय वचपी दुयेंतींची रावपाची तजवीज जातली, अशी घोशणा हालींच जाल्ली. बुकिंगाची सुविधा आॅनलायन आसची. ते खातीर कोणाचो वशिला लावपाचो वेळ येवंक फावना. धर्मीक पर्यटन हें गरजेचेंच, ताचे परस भलायकी, शिक्षण हेंय म्हत्वाचें. मनशाची ही मुळावी गरज. शिक्षण, भलायके संबंदी कोणाक मजत करप हाचे सारकें दुसरें कार्य ना. देवकार्यूच तें. तेन्ना भावीक, विद्यार्थी आनी दुयेंतींक थाकाय मेळची म्हूण गोंय सरकारान गोंय सदनांचें मनार घेवचेंच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
