गोंय संवसारांत आदर्श जैवविवीधता राज्य करपाचो संकल्प: मुख्यमंत्री
भांगरभूंय | प्रतिनिधी
सांखळे जैवविवीधता दिसा राज्य पुरस्कार भेटयले
दिवचल: गोंय हें जैवविवीधतेचो खजिनो आशिल्लें राज्य. आयज हांगच्यो जायत्यो दुर्मीळ गजाली नश्ट जातना दिसतात. तांचो सांबाळ आनी पुनर्जीवन करपा खातीर राज्यांतल्या दरेका घटकांचें सहकार्य गरजेचें. राज्य संवसारीक पांवड्यार जैवसंपदा राज्य करपाचो आमचो निर्धार आशिल्ल्यान ते खातीर लोकांनी वांटेकार जावपाची गरज आसा. राज्यांत सात सुवातांचेर जैवविवीधता केंद्र सुरू केल्ल्याची घोशणा मुख्यमंत्र्यांनी सांखळे दिली.
आंतरराष्ट्रीय जैवविवीधता दिसा निमतान आयोजीत कार्यावळींत ते उलयताले.
दुर्मीळ वनस्पती जीव जंतू सांबाळप गरजेचें. गोंयच्या विवीध वाठारांनी आशिल्ल्या पुरातन कडधान्य, पालेभाजी, कंदमुळां, वखदी गुणधर्म आशिल्ल्यो वनस्पती शेणत वचपाचो भंय उक्तायतना तांचो सांबाळ करपा खातीर नवे पिळगेन विशेश योगदान दिवपाचो उलो मुख्यमंत्र्यांनी मारलो सह्याद्री वाठार हो जैवसंपदेचो मुकूट आसा. तो राखून दवरपा खातीर खुबशे मानेस्त काम करतात. तरणाट्यांनीय ताचे खातीर आपलें योगदान दितनाच परंपरीक जैवीक संपदा राखून दवरप गरजेचें आशिल्ल्याचें तांणी सांगलें.
शेतां, कुळागरां, खाजन अश्यो जायत्यो जैवीक संपदा आमच्या पूर्वजांनी पिळग्यान पिळग्यो राखून दवरपाचें काम केलां. कुळागरांत विवीध पिकां घेवप शक्य आसा. सैमा कडेन समन्वय सादून तो तिगोवप गरजेचें. हे खातीर तरणाट्यांनी विशेश योगदान दिवचें.
प्लास्टिक ना करून पर्यावरण राखपा खातीर सगल्यांनी कार्यरत रावचें. गोंयांत अभयारण्य पळोवपा खातीर लोक येवचे तशेंच जैवीक संपत्तीचो खजिनो आशिल्ल्या गोंयांक नवी वळख करून दिवपा खातीर जैवविविधता सांबाळप गरजेचें. पुराय गोंय पाचवेंचार जावचे खातीर विवीध माध्यमांतल्यान सरकाराचे यत्न चालूच आसात. मायनिंगचें डंपूय पाचवेचार करपाचो यत्न सुरू आसात अशें मुख्यमंत्र्यानी म्हणलें.
दरेका म्हालांत एका नव्या जैवीक पदार्थाची वळख जावचे खातीर आमी यत्न करतात. राज्यांतले मिठागर नव्यान सुरू करपाची घोशणा मुख्यमंत्र्यांनी केली. गोंयांत ऍग्रो क्लिनीक जूना सावन सुरू जातलें अशेंय तांणी सांगलें.
ह्या वेळार विवीध मळार जैवविवीधताय संवर्धना खातीर काम करपी मानेस्तांक मुख्यमंत्र्यांच्या हस्तुकीं पुरस्कार भेटयले.
ह्या वेळार माचयेर डॉ श्रीधर ठाकूर, डॉ अर्चना गोडबोले, नगराध्यक्ष सिद्धी प्रभू, लेवीन्सन मार्टिन्स, सचिन देसाय, जैवविवीधता मंडळाचे वांगडी सचीव डॉ. प्रदीप सरमुकादम, संदीप फळदेसाय, विजयकुमार नाटेकार आनी हेर मानेस्त हजर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
