भांगरभूंय | प्रतिनिधी
कृष्णा साळकारः वास्को मनयली 112 वा जयंती
भांगरभूंय । प्रतिनिधी
मुरगांवः गोंयांत शिक्षण मळाचेर क्रांती घडोवपी तशेंच कृशी, उद्देग, खेळां वांगडाच समाजीक मळाचेर फुडें व्हरपी फुडारी म्हणल्यार गोंयचे भाग्यविधाते तशेंच पयले मुख्यमंत्री दयानंद बांदोडकार. गोंय शिक्षणीक मळाचेर उदरगतीचे दिशेन मुखार सरता हाचें पुराय स्रय बांदोडकार हांकां वता, अशें वास्कोचे आमदार कृष्णा साळकार हांणी सांगलें.
वास्कोच्या जोशी चौकांत बांदोडकार हांची 112 वी जयंती मनयली. त्या वेळार आमदार साळकार हांचे हस्तुकीं बांदोडकार हांच्या पुतळ्याक फुलांचो हार घालून आर्गां ओंपलीं. ह्या वेळार तांचे वांगडा गोंय मनीसबळ उदरगत विभागाचे उपाध्यक्ष दीपक नायक, गोंय अर्थीक उदरगत म्हामंडळाचे उपाध्यक्ष संजय सातार्डेंकार, मुरगांवचे उपनगराध्यक्ष अमय चोपडेंकार, नगरसेवक गिरीश बोरकार, नगरसेविका शमी साळकार, आदली नगराध्यक्ष तारा केरकार, आदले नगराध्यक्ष अरविंद शिंदे, आदली नगरसेविका रोचना बोरकार, उद्देजक उमेश साळगांवकार, वानव चोडणकार, भानुदास नेरुलकार, प्रकाश गांवस, प्रशांत हळदणकार, प्रशांत नार्वेंकार, दामोदर लोटलीकार, विष्णू गारुडी, अॅड. राजीव ढवळीकार, अरुण आजगांवकार आनी हेर मानेस्त हाजीर आशिल्ले.
आमदार साळकार हांणी सांगलें, गोंयाक खऱ्या अर्थान शिक्षणीक क्रांती मेळ्ळी ती बांदोडकार हांच्या फुडारपणा खाला. कृशी, उद्देगांत गोंयाक नवी वळख दिवन बांदोडकार हांणी गोंयचें नांव वयर काडलें.
वामन चोडणकार हांणी सांगलें, भोवजन समाजाचें फुडारपण सांबाळपी बांदोडकार हे एकमेव फुडारी आशिल्ले. तांची गोंयचे उदरगतींत व्हड सुवात आसा. आयच्या तरणाट्यांनी बांदोडकार हांचे विचार आपणावचें.
तारा केरकार, अॅड. ढवळीकार हांणीय ह्या वेळार आपले विचार मांडले. गिरीश बोरकार हांणी सुत्रसंचालन केलें. अरूण आजगांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
