गोंय वैजकी म्हाविद्यालयांत 26 पदां खातीर जातली भरती

भांगरभूंय | प्रतिनिधी

पणजीः गोंय वैजकी म्हाविद्यालयांत (जीएमसी) 26 वेगवेगळ्या पदां खातीर भरती जातली. हातूंतली कांय पदां कंत्राटी पद्दतीन आनी कांय लिव्ह व्हॅकेन्सी पद्दतीन भरतले. ह्या पदां खातीर 6 आनी 7 फेब्रुवारीक गोमॅकाँत लायव्ह मुलाखती जातली. वट्ट 26 पदां मदीं चडांत चड 19 रितीं पदां नर्सीं खातीर आसात. ट्रान्सफ्युजन विभागात 2 ट्यूटर, तंत्रज्ञाच्याे 2, वखदातज्ञ आनी वैजकी पदां खातीर दरेकीं एक पद भरतले.

नर्स पदा खातीर 19 रित्यो सुवाती लिव्ह व्हॅकेन्सी पद्दतीन भरतले. ते खातीर बी. एससी नर्सींग वा मान्यताय प्राप्त नर्सींग संस्थेचो अभ्यासक्रम पुराय केल्लो आसप गरजेचें. ह्या पदाचेर म्हयन्याक 43,550 रुपया पगार दितले. उमेदवाराची पिराय 45 वर्सां परस चड आसूंक फावना. सरकारी कर्मचाऱ्यां खातीर ही पिरायेची गरज सदळ जातली. ह्या पदाच्यो थेट मुलाखती 6 फेब्रुवारीक सकाळीं 10 वरांचेर जातल्यो.

ट्रान्सफ्युजन विभागांतल्या 2 ट्युटरांच्या पदां खातीर 7 फेब्रुवारीक दनपारां 3 वरांचेर मुलाखती जातल्यो. ह्या पदाचेर म्हयन्याक पगार 80 हजार रुपया आसा. दोनूय पदां एका वर्साच्या कंत्राटाचेर भरतले. उमेदवारांक वैजकी मळार पदव्युत्तर पदवी आसपाक जाय. डायलिसीस आनी रेडिओग्राफीक तंत्रगिन्यानांत दरेकीं एक पद भरतले. हे खातीर 7 फेब्रुवारीक सकाळीं 10 वरांचेर मुलाखत जातली. फार्मासिस्ट आनी मेडिकल सोशल वर्कर ह्या पदां खातीर दरेकीं एक रिती सुवात मेळोवपा खातीर 7 फेब्रुवारीक दनपारां 3 वरांचेर मुलाखती जातल्यो.