भांगरभूंय | प्रतिनिधी
पणजी: गोंय विद्यापिठान 2025-26 शिक्षणीक वर्सां विद्यापीठ तशेंच म्हाविद्यालयांत पदव्युत्तर अभ्यासक्रमाच्या प्रवेशा खातीर भायल्या विद्यापिठांतल्या विद्यार्थ्यां खातीरचो कोटा सुमार दुपेटीन केल्लो. हे विशींची खबर ‘भांगरभूंय’न बिरेस्तारा उजवाडायिल्ली. उपरांत विद्यापिठान हो निर्णय रोखडोच फाटीं घेतलो. ते प्रमाण 4 आनी 5 एप्रीलाक जावपी प्रवेश फेरये खातीर फाटल्या वर्सा प्रमाण भायल्या विद्यापिठांतल्या चडांत चड दोनूच विद्यार्थ्यांक प्रवेश दितले.
हे विशीं अदीक म्हायती अशी, विद्यापिठान 2024-25 च्या पदव्युत्तर अभ्यासक्रमाच्या प्रवेशांत भायल्या विद्यापिठांतल्या विद्यार्थ्यां खातीर धा टक्के आरक्षण पूण चडांत चड दोनूच सुवातो आरक्षीत दवरिल्ल्यो. गोंय विद्यापिठान प्रवेश रँकिंग टेस्ट (जीयूएआरटी) 2025-26 वर्सा चडांत चड दोन सुवातो आरक्षीत दवरपाचो नेम वगळिल्लो. विवीध अभ्यासक्रमांनी आरक्षण आशिल्ल्यान उक्त्या प्रवर्गातल्या विद्यार्थ्यांक हाचो चड फटको बसपाचो.
नव्या नेमा प्रमाण जीयूएआरटी 2025-26 वर्सा अभ्यासक्रमां प्रमाण 1 ते 10 सुवातो भायल्या विद्यार्थ्यां खातीर राखीव दवरिल्ल्यो. अंदूं पदव्युत्तर अभ्यासक्रमाच्या वट्ट 1133 सुवातां पैकीं 112 सुवातो भायल्या विद्यापिठाच्या विद्यार्थ्यां खातीर राखीव आशिल्ल्यो. जाल्यार विद्यापिठाच्या संलग्न आशिल्ल्या म्हाविद्यालयांत वट्ट 1046 पैकी 105 सुवातो भायल्या विद्यापिठाच्या विद्यार्थ्यां खातीर राखीव दवरिल्ल्यो. पूण ह्या निर्णयाक विरोध जावंक लागिल्ल्यान भायल्या विद्यापिठांतल्या विद्यार्थ्यांच्यो सुवातो परतून चडांत चड दोन केल्यात.
हे विशीं विद्यापिठान काडिल्ल्या प्रसिद्धी पत्रकांत म्हणलां, अभ्यासक्रम प्रवेशाचे पयले फेरयेंत भायल्या विद्यार्थ्यांचे श्रेणींतली रिती सुवात अनारक्षीत सुवातां मदीं रुपांतरीत करतात. हाका लागू गोंयांतल्या विद्यार्थ्यांक सुवात उपलब्ध जाता. तरी लेगीत गोंदळ टाळपा खातीर विद्यापिठान सद्याचे प्रवेश फेरयेंत पदव्युत्तर अभ्यासक्रमांतल्या प्रवेशांत भायल्या चडांत चड दोन विद्यार्थ्यांक प्रवेश दिवपाचे पयलींचें धोरण कायम दवरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
