भांगरभूंय | प्रतिनिधी
पणजी: गोंय विद्यापीठान ESCO Global (Absolute) Pvt Ltd नवी दिल्ली पुरस्कृत डिस्कवरिंग द नेचर अँड इट्स मायक्रोब्स ह्या संशोधन प्रकल्पाचेर काम करपा खातीर २ प्रकल्प सहाय्यक पदांच्या जाग्यां खातीर पात्र उमेदवारांकडल्यान साध्या कागदाचेर अर्ज मागयल्यात.
निवड जाल्ल्या उमेदवारांक नमुने एकठाय करपा खातीर पुराय गोंय राज्यांत फील्डवर्क करचें पडटलें तशेंच गोंय विद्यापीठाच्या स्कूल ऑफ बायोलॉजिकल सायन्सेस अँड बायोटेक्नॉलॉजी विभागांत सुक्ष्मजीवशास्त्रीय विश्लेशण आनी संवर्धनक्षम सुक्ष्मजंतूंचे पृथक्करण करचें पडटलें.
उमेदवार प्रयोगशाळा विश्लेशण अणभवा सयत एमएससी सुक्ष्मजीवशास्त्र/जैवतंत्रज्ञान/सागरी विज्ञान/वनस्पतशास्त्र/प्राणीशास्त्रात एमएससी पात्र आसपाक जाय. सुक्ष्मजीवशास्त्राच्या क्षेत्रांत सागरी अधिवासांतल्यान नमुने संकलनाचो आनी सुक्ष्मजीव संस्कृतींच्या पृथक्करणा खातीर प्रयोगशाळा विश्लेशण कामाचो अणभव आसपाक जाय. म्हयन्याक २०,०००/- रूपया (एकठांय) पगार आसतलो. प्रकल्पाचो काळ तीन म्हयन्यांचो आसा. उमेदवाराची पिराय ३५ वर्सां परस चड आसची न्हय.
इत्सूक आनी पात्र उमेदवारांनी १२ जुलय २०२४ दिसा सकाळीं १० वरांचेर मायक्रोबायोलॉजी विभाग, स्कूल ऑफ बायोलॉजिकल सायन्सेस अँड बायोटेक्नॉलॉजी, गोंय विद्यापीठ, हांगा अर्ज, मुळ गुणपत्रीका, प्रमाणपत्रे आनी तांच्या झेरॉक्स प्रती सयत मुलाखतीक हजर रावचें. तशेंच उमेदवार आपलो अर्ज : [email protected] चेर ई-मेल करपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
