भांगरभूंय | प्रतिनिधी
पणजीः गोंय विद्यापीठांतल्या म्हत्वाच्या पदांचेर भायल्यांक नेमपाचो आनी ते खातीर गोंय राबितो दाखल्याची अट रद्द करपाचो ‘मास्टर प्लॅन’ गोंय विद्यापीठाचे कुलगुरू डॉ. हरिलाल मेनन हांणी चालीक लायला. देखून गोंय विद्यापीठाचें रँकींग देवपाचें खांपर गोंयच्या प्राध्यापकांचेर फोडप हो गोंयकारांचो अपमान जावन आसा. कुलगुरू हरिलाल मेनन हांणी चूक मागची नाजाल्यार ‘रेव्ह्युलेशनरी गोवन्स’ विद्यापीठांत आंदोलन करतले, अशी शिटकावणी रेव्ह्युलेशनरी गोवन्स पक्षाचे अध्यक्ष मनोज परब हांणी दिल्या.
राबितो दाखल्या वरवीं गोंयकार प्राध्यापकांची नोकर भरती जाता. म्हण विद्यापीठाचें रँकींग देवपाक कुलगूरू हलरिलाल मेनन हांचें विधान हे गोंयचे गुणवान, गोंयकार भुरगे आनी गोंयकारांचो अपमान जावन आसा, असो आरोप मनोज परब हांणी पणजे घेतिल्ले पत्रकार परिशदेंत केलो. ह्या वेळार आमदार विरेश बोरकार हजर आशिल्ले.
रँकींग देवपा फाटल्यान बरींच कारणां आसात. तातूंत विद्यापीठाची भितरली अकार्यक्षमता, भितरलें संसोधन कामकाज वा वाचनालयाचो कमी वापर हांचो आस्पाव आसूं येता. कसलोच धड अभ्यास करिनासतना आनी पुरावो नासतना विधान करप चुकीचें आसा. हें विधान मुद्दाम केलां. गोंय विद्यापीठाचे मुखेली सगळे भायले आसात आनी तांकां आपल्या लोकांक भरपाक जाय म्हण तांकां विद्यापीठांत गोंयकार नाकात, असो आरोप परब हांणी केलो.
आपल्या राज्यांतल्यान जाय त्या लोकांक हाडून बरीं पदां दिवन तांकां वयर काडटात आनी गोंयकारांक शिकोवन घरा बसयतात. मेनन हांचो होच बेत आसा देखून राबितो दाखलो सक्ती भायर मारून कोंकणीची सक्ती आनी मराठी इत्सूक ही अट भायरावपाचें तांच्या मनांत आसा. जे नवे अभ्यासक्रम विद्यापीठान केन्ना शिकोवकच ना ते अभ्यासक्रम हाडून आपले मनीस भरपाचे यत्न चल्ल्यात, असोय आरोप परब हांणी केलो.
मेनन येदें व्हडलें विधान करता पूण मुख्यमंत्री डॉ. प्रमोद सावंत हाचेर ओगीच आसात. स्वयंपुर्ण गोंय म्हणपी मुख्यमंत्र्यान तांकां शिटकावणी दिवपाक जाय आसली. विद्यापीठांतल्यो नोकर्यो भायल्यांक विकात अशी केंद्राच्यान ओर्द आयल्या आसतली. आमी राबितो दाखलो काडपाक कशेच दिवपाचे नात. मेनन गोंयकारांची माफी मागची ना जाल्यार विद्यापीठाचेर आंदोलन करपी आरजीपी पयले आसतले, अशी शिटकावणी परब हांणी दिली.
फाटलीं जायतीं वर्सां राबितो दाखलो ही अट अस्तित्वांत आसली. मात त्या तेंपार रँकींग बरें आसले. मात हे रँकींग आतांच कित्याक देंवलां. ह्या अर्थसंकल्पांत फकत २०० कोटी सुविधांचें आनी १०० कोटी हेर गजालीं खातीर विद्यापीठांक मेळटा. गोंयकारांचो पयसो विद्यापीठाक दिता पूण थंयसर गोंयकारांक प्राधान्य मेळना. आतां आमी ओगी रावचे नात. तुमकां आतां धडो शिकोवपाचो वेळ आयला, अशी शिटकावणी विरेश बोरकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
