भांगरभूंय | प्रतिनिधी
एनएसयुआय, अभावीपाचे विद्यापीठांत धरणें
पणजीः गोंय विद्यापीठाची विद्यार्थी परिशद वेंचणूक अचकीत रद्द केल्ल्या कारणान गोंय विद्यापीठांत ताण निर्माण जालो. एनएसयुआय आनी अभावीप हे दोनय विद्यार्थी संघटणेन हाचो खर निशेध करून गोंय विद्यापीठाच्या विद्यार्थी कल्याण विभागा मुखार धरणें धरलें. एनएसयुआयच्या जैताक भियेवन सरकारान ही वेंचणूक रद्द केल्या, असो आरोप एनएसयुआयन केला.
मंगळारा सकाळच्या १०.३० वरांचेर गोंय विद्यापीठाची कार्यकारी विद्यार्थी परिशदेची वेंचणूक जावपाची आसली. मात झेडपी वेचणुकेच्या आचार संहीतेचे कारण दिवन गोंय विद्यापीठान ही वेंचणूक रद्द केली. ह्या निर्णयाक लागून मतदान करपाक आयिल्ल्या विद्यार्थ्यां मदीं निर्शेवणी तयार जावन उपरांत वाद तयार जालो.
गोंय विद्यापीठाची वेंचणूक मतदान सुरू जावचे १५ मिनटां पयलींच अचकीत रद्द केली. हे वेंचणुकेची सगळी प्रक्रीया जावन लेगीत वेंचणूक रद्द करपाचो निर्णय घेतला, असो आरोप एनएसयुआयचे अध्यक्ष नौशाद चौधरी हांणी केलो. ही वेंचणूक जिखपा खातीर भाजप आनी अभावीप हांचे कडेन उणीं मतां आशिल्ल्या कारणान ही वेंचणूक रद्द केल्या आसुये. आमचें जैत निश्चीत आसलें. वेंचणूक फुडें धुकल्ली तरी आमचेंच जैत जातलें. ही वेंचणूक रद्द करपाच्या निर्णयाक उच्च न्यायालयांत आव्हान दितले, अशी शिटाकावणी चौधरी हांणी दिली.
वेंचणुके खातीर पेडणें ते काणकोण मेरेनचे वावुरपी जमा जावन मतदाना खातीर आमी विद्यापीठांत पावले तेन्ना वेंचणूक फुडें धुकल्ल्याची नोटीस पळोवन धक्को बसलो, अशे अभावीपचे उत्तर गोंय सह संयोजक अंशूल सिनारी हांणी सांगलें.
आमी विद्यापीठाचे विद्यार्थी कल्याण विभागाक हे विशीं जाप विचारली. ही वेंचणूक झेडपी वेंचणुकेचे आचारसंहीतेक लागून फुडें धुकल्ल्याचें कारण तांणी दिलें. झेडपी वेंचणुकेची आचारसंहीता आसा तें आमी मान्य करतात. मात आचारसंहीता अंमलात आसा हाची जाणवीकाय गोंय विद्यापीठाक आसा. मात अचकीत ही वेंचणूक रद्द करपाच्या निर्णयाचो आमी निशेध करतात, अशें सिनारी हांणी म्हणलें.
आमचे गोंयभर सावन ५५ परस चड तरणाटे मतदान करपाक आयिल्ले. जर आयजूच वेंचणूक जाता आसली जाल्यार अभाविपचें जैत हें १०० टक्के निश्चीत आसलें. मात जी वेंचणूक फुडें धुकल्ल्या ताची बेगनचे बेगीन नवी तारीख जाहीर करची आनी वेंचणुकेची लोकशायेच्या मार्गान प्रक्रीया करची, अशी मागणी सिनारी हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
