भांगरभूंय | प्रतिनिधी
पणजीः गोंय विद्यापीठ, शणै गोंयबाब भाशा आनी साहित्य महाशाळा कोंकणी अध्ययन फांट्याच्या कोंकणी सरस्पत मंडळान 16 आनी 17 डिसेंबर 2025 अशें दोन दीस कथा संमेलन घडोवन हाडलें.
संमेलनाच्या उक्तावण सुवाळ्याची सुरवात येवकार गितांतल्यान जाली. ह्या उक्तावण सुवाळ्या निमतान मुखेल सोयरे भालचंद्र गांवकार, मानाची सोयरी नयना आडारकार, अधिष्टाता प्रो. अनुराधा वागळे, संचालक प्रा. कृपाली नायक, अध्यक्ष डॉ. हनुमंत चोपडेंकार, संयोजक प्रा. नरेश नायक हाजीर आशिल्ले.
प्रास्तावीक उलोवप करताना प्रा. नरेश नायक हांणी “कोंकणी युवा कथाकार गोंयचें प्रतिनिधित्व करपी कथा घेवन गोंय विद्यापिठांत येतात आनी आमकां मागदर्शन करपाची संदी दितात हें संमेलनाचें जैत अशें तांणी सांगलें.
सुवाळ्याचें उक्तावण कथेच्या घटकांक सूर्य फुलाची पाकळी दसोवन वेगळे पद्दतीन घडलें. तेभायर वण्टीपत्रकाचें उक्तावण भालचंद्र गांवकार ह्या मुखेल सोयऱ्यांच्या हस्तुकी जालें. “बरो कथाकार जावपाक डिग्रीचें शिक्षण नाका पूण जिविताच्या अणभवाचें शिक्षण मात जाय. अशें तांणी सांगलें.
नयना आडारकार हांणी बीजभाशण केलें. कथा बरयतना शीर्शक, सुसंगत भास, परिपक्व मांडणी, विशय वस्तू, पात्र, संवाद, शैली ह्यो सगल्यो गजाली म्हत्वाच्यो आसून सृजनशीलताय आनी लेखकाचो अणभवूय गरजेचो आसाता अशें सांगलें. ह्या येवकार सुवाळ्याचें सुत्रसंचालन नायजल परेरा हांणी केलें.
‘युवा कथा लेखका कडेन संवाद’ ह्या पयल्या सत्रांत लेखक गोरख शिरसाट हांणी युवा गुजराती लेखक आनी साहित्य अकादेमी पुरस्कार जैतीवंत राम मोरी हांची मुलाखत घेतली. ह्या वेळार तांणी आपले जिणे अणभव आनी संदेश दितना म्हणलें, “अगर आप अच्छे पाठक हो तो आप अपने आप में अच्छे कहानिकार हो । मैं उनके लिए लिखता हूँ जो लिख नहीं पाते । मैं उन सब की कहानी बता रहा हूँ जो आँखों से भी अपनी कहानी बताने की जुरत नहीं कर पाते ।’’ ह्या सत्राचें संयोजन गायत्री नायक हिणें केलें.
‘कथा कथन तंत्र’ ह्या दुसऱ्या सत्रांत राम मोरी हांणी आपल्या इकिस्वा टिफीन ह्या फिल्माची कथा घेवन वेगळ्यावेगळ्या आयामांनी कशे विचार आनी कथन करूं येता हाचेर उलोवप केलें. रोचक पद्दतीन कथा कथनाचें तंत्र समजायलें. ह्या सत्राचें संयोजन रोहीत मळगांवकार हांणी केलें. पयल्या दिसाचें संमेलन हांगा सोंपलें.
बुधवारा 17 डिसेंबर ह्या दुसऱ्या दिसा ‘कथा मार्गदर्शनाचें’ तिसरें सत्र घडोवन हाडलें. प्रो. गोरख शिरसाट आनी डॉ. हेमंत अय्या हांणी युवा कथाकारांक तांचे कथेची बळस्थानां आनी त्रृटी दाखोवन कथा कशी सुदारूं येता हाचेर योग्य मार्गदर्शन केलें. ह्या सत्राचें संयोजन वालुश्का हिणें केलें.
निमाणे कडेन कथा संमेलनाचो समारोप आनी इनामां वांटप सुवाळो जालो. ह्या समारोप सुवाळ्याक विद्यापिठाचे कुलसचीव आनी समारोप सुवाळ्याचे मुखेल सोयरे डॉ. सुंदर धुरी, राम मोरी, अधिष्टाता प्रो. अनुराधा वागळे, अध्यक्ष आनी संशोधन उपअधिष्टाता डॉ प्रकाश पर्येंकार, संचालक प्रा. कृपाली नायक, संयोजक प्रा. नरेश नायक, मंडळाचें अध्यक्ष सिमरन विर्नोडकर आनी सचीव साईजल बांदोडकर हाजीर आशिल्लीं.
संचालक कृपाली नायक हांणी येवकाराचें जाल्यार संयोजक नरेश नायक हांणी प्रास्तावीक उलोवप केलें. हे सर्तीत वांटेकार जाल्ल्यां ओमकार गांवकार आनी सुजाता कांबळी हांणी संमेलनाचे बाबतींत आपल्यो प्रतिक्रिया उक्तायल्यो. सचीव साईजल बांदोडकर हांणी सगल्यांचे उपकार आठयले. समारोप सुवाळ्याचें सुत्रसंचालन स्लिफन सिमॉयश हांणी केलें.
कथा संमेलनांत 29 सर्तकांनी वांटो घेतिल्लो. इनामां जाहीर जालीं ते प्रमाण पयलें इनाम ओमकार गांवकर (अनुत्तरीत कथेक), दुसरें इनाम प्रतिक्षा सागांवकर (माका बोगोस कथेक) आनी तिसरें इनाम सुजाता कांबळी ( पिसो सोपो कथेक) फावो जालें. जाल्यार चवथें इनाम दिव्या गोवेकार (टिंडर कथेक) हिका आनी पांचवें इनाम प्रेमजीत वेळीप (म्हालो कथेक) हांकां फावो जालें.
तशेंच तीन उमेद वाडोवपी इनामां आशिल्लीं तातूंत पयलें इनाम यशंवत भट (कीक कथेक), दुसरें इनाम कृपेश गांवकर (फुळ्ळीक कथेक) जाल्यार तिसरें इनाम स्लिफन सिमॉइस (रात केदना सोंपतली कथेक) हांकां फावो जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
