भांगरभूंय | प्रतिनिधी
पणजी : गोंय विद्यापीठान राष्ट्रीय मुल्यांकन आनी मान्यता परिशदेच्या (NAAC) नव्या ऍक्रिडिटेशन सायकलींत A+ ग्रेड मेळयत इतिहासीक येस मेळयलां. विद्यापीठाक ह्या वेळार ३.३ असो सीजीपीए मेळ्ळा, ही मान्यताय २०३० मेरेन वैध उरतली. ह्यान पयलीं विद्यापीठाक इ+ रेटींग आशिल्ली.
विद्यापीठाचो शिक्षणीक दर्जो, संशोधन काम, मुळाव्यो सुविधा आनी विद्यार्थ्यांक दिवपी सुविधां विशीं उत्कृश्ठ उदरगत जाल्ल्याचें हाचेवेल्यान कळून येता. मुख्यमंत्री डॉ. प्रमोद सावंत हांणी गोंय विद्यापीठाक मेळिल्ल्या ह्या येसाचीं परबीं भेटयतना म्हणलें, विद्यापीठाच्या इतिहासांत पयलेच फावट मेळिल्ली ही मान्यताय राज्याच्या शिक्षणक्षेत्रांतल्या सातत्यपूर्ण उदरगतीचें प्रतीक.
ह्यान पयलीं २०१४ ते २०१९ ह्या काळांत विद्यापीठाक ए ग्रेड (सीजीपीए ३.०१ ते ३.२५) मेळिल्ली. मात, २०२२ ते २०२७ खातीर विद्यापिठाक इ++ ग्रेड दिल्ली. अंदूं मेळिल्ली ए+ ग्रेड ही ताचे तुळेंत व्हड उदरगत मानतात.
नॅकचे मुल्यांकन प्रक्रियेंत ७० टक्के गूण शुद्ध आंकड्यांचेर आदारून आसतात. जशें शिक्षकांची शिक्षणीक पात्रताय, कायमस्वरूपी शिक्षकांची संख्या, रित्या पदांची स्थिती आनी हेर गजाली. उरिल्लें ३० टक्के मुल्यांकन नॅकच्या तज्ज्ञ समितीच्या प्रत्यक्ष भेटी उपरांत करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
