भांगरभूंय | प्रतिनिधी
डॉ. प्रमोद सावंत: संगीत, फार्मसी, आर्किटेक्चर म्हाविद्यालयांचो आस्पाव
पणजी: गोंय विद्यापिठाच्या स्वतंत्र कॉम्प्लेक्सांत फार्मसी, आर्किटेक्चर आनी संगीत म्हाविद्यालय बांदतले अशी म्हायती मुख्यमंत्री डॉ. प्रमोद सावंत हांणी दिली. सोमारा गोंय विद्यापीठ आनी उच्च शिक्षण खात्या वतीन आयोजीत यंग लिडर काँक्लेव्ह हे कार्यावळींत ते उलयताले. ह्या वेळार आर्यन खेडेकार हांणी तांची मुलाखत घेतली. मुख्यमंत्र्यांनी हाजीर आशिल्ल्या विद्यार्थ्यां कडेन अनौपचारीक संवाद सादलो.
मुख्यमंत्र्यांनी म्हणलें, फार्मसी म्हाविद्यालयाच्या इमारतीची स्थिती पिड्ड्यार जाल्या. आमी नवी इमारत बांदपा खातीर सुवात पळयिल्ली. पूण हातूंत कांय कायदेशीर अडचणी आयिल्ल्यान आमी दुसरी सुवात सोदतात. गोंय विद्यापिठांत 2 लाख चौखण मिटर सुवातेंत एक कॉम्प्लेक्स बांदून हांगा फार्मासी सयत आर्किटेक्चर आनी संगीत म्हाविद्यालय बांदपाचो आमचो विचार आसा. फुडल्या स म्हयन्यांत म्हाविद्यालयाच्या नव्या इमारतीची बुन्याद घालतले अशें तांणी म्हणलें.
तांणी मुखार उलयतना म्हणलें, सद्या गोंयांत 50 ते 60 आयटी कंपनीं काम करतात. गोंयांत सद्या आयटी हब ना. अशें आसलें तरी फुडारांत गोंयांत आयटी हब करतले. सरकारान हालींच राज्यांत 40 कडेन फुकट वायफाय हॉट स्पॉट सुरू केल्यात. हाचो विद्यार्थ्यांनी वापर करचो. पयलींच्या काळांत म्हायती मेळप हें सहज शक्य नाशिल्लें. आतां मोबायल वा इंटरनेटार रोखडीच म्हायती मेळूंक शकता. पूण खूबशे जाण इंटरनॅटा वेल्यो बऱ्यो गजाली घेवपाचें सोडून हेर गजाली तितल्योच घेतात. मोबायल इंटरनॅटाचो वापर स्वताच्या विकासा खातीर करून घेवपाचो काय ना हें जाणें ताणें थारावपाचें आसा.
गोंयांत नर्सिंगेचे खूबशे विद्यार्थी बीएससी करून नोकरी करतात. हाका लागून एमएससी नर्सींग धारकांची संख्या उणी आसा. सद्या राज्याक एमएससी नर्सींग केल्ल्या लोकांची गरज आसा. बीएससी प्रमाण एमएससी नर्सिंगेक शिश्यवृत्ती ना. तरी विद्यार्थ्यांची मागणी आसत जाल्यार मुख्यमंत्री अप्रेंटिशीप येवजणे खाला एमएससी नर्सिंगेच्या विद्यार्थ्यांक अर्थीक मजत दिवपा विशीं विचार करूं अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
