भांगरभूंय | प्रतिनिधी
थळाव्या विद्यार्थ्यांचेर अन्याय; विद्यापिठाचो निर्णय वादग्रस्त थारपाची शक्यताय
पणजी: गोंय विद्यापिठान घेतिल्लो एक निर्णय वादग्रस्त थारपाची शक्यताय आसा. अंदूंच्या शिक्षणीक वर्सां सावन गोंय विद्यापिठांत आनी संलग्न म्हाविद्यालयांत पदव्युत्तर अभ्यासक्रमांत गोंया भायल्या विद्यापिठांच्या विद्यार्थ्यांचो प्रवेश कोटा सुमार दुपेटीन केला. हाका लागून थळाव्या विद्यार्थ्यांच्यो सुवातो उण्यो जावन तांचेर अन्याय जातलो.
गोंय विद्यापिठाच्या संकेतथळार उपलब्ध आशिल्ल्या गोंय विद्यापीठ प्रवेश रँकिंग टेस्ट (जीयूएआरटी) 2025-26 च्या ब्रोशरांत नवे बदल केल्यात. 2024-25 वर्सा भायल्या विद्यार्थ्यांक 10 टक्के सुवातो आरक्षीत आशिल्ल्यो. पूण चडांत चड दोनूच सुवातांचेर आरक्षण दिताले. 2025-26 वर्सा चडांत चड दोन सुवातो आरक्षीत दवरपाचो नेम वगळ्ळो. हाका लागून थळाव्या विद्यार्थ्यांक उण्यो सुवातो उरल्यात. विवीध अभ्यासक्रमांत आशिल्लें आरक्षण आशिल्ल्यान उक्त्या प्रवर्गांतल्या विद्यार्थ्यांक हाचो चड फटको बसतलो.
मेळिल्ले म्हायती प्रमाण 2024-25 वर्सा विद्यापिठांत पदव्युत्तर अभ्यासक्रमाच्याे वट्ट 1181 सुवातो आशिल्ल्यो. हातूंतल्यो 68 सुवातो भायल्या विद्यार्थ्यां खातीर राखीव आशिल्ल्यो. अंदूं पदव्युत्तर अभ्यासक्रमाच्याे वट्ट 1133 सुवातो आसात. हातूंतल्यो 112 सुवातो भायल्या विद्यापिठाच्या विद्यार्थ्यां खातीर राखीव आशिल्ल्यो. जाल्यार विद्यापिठाच्या संलग्न आशिल्ल्या म्हाविद्यालयांत फाटल्या वर्सा 1094 सुवातां मदीं भायल्या विद्यापिठाच्या विद्यार्थ्यां खातीर 54 सुवातो आशिल्ल्यो. अंदूं वट्ट 1046 पैकीं 105 सुवातो भायल्या विद्यापिठाच्या विद्यार्थ्यां खातीर राखीव आसात.
अंदूंच्या शिक्षणीक वर्सांत अभ्यासक्रमा प्रमाण भायल्या विद्यापिठाच्या विद्यार्थ्यांक 1 ते 10 सुवातो आरक्षीत दवरल्यात. हाका लागून एमएससी (रसायनशास्त्र), एमसीए, एमकॉम अशा मागणी चड आशिल्ल्या अभ्यासक्रमां मदल्यो थळाव्यांक उण्यो सुवातो मेळटल्यो. हाका लागून प्रवेश मेळूंक नाशिल्ल्या विद्यार्थ्यांक खर्चीक आशिल्ल्या खाजगी म्हाविद्यालयांनी, विद्यापिठांनी प्रवेश घेवचो पडटलो अशी शक्यताय आसा.
भायल्या विद्यार्थ्यांच्यो सुवातो
विशय / वर्स 2024-25 / वर्स 2025-26
एमए इंग्लीश / 2 / 6
एमए कोंकणी 2/6
एमए इतिहास 2/6
एमएससी रसायनशास्त्र 2/10
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
