भांगरभूंय | प्रतिनिधी
सिटिझन्स फॉर डेमोक्रेसी वतीन हरकत घेवपी विद्यापिठाक पत्र
पणजी : गोंय विद्यापिठांत संगणक शिक्षका खातीरची जायरात साडे तीन वर्सां पयलीं जारी जाल्ली आसली तरी ताचे खातीरची मुलाखत आतां 24 ते 26 एप्रील मेरेन आयोजीत केल्या. जायरात जारी जावन साडेतीन वर्सां उपरांत मुलाखत घेवपाच्या प्रकाराक हरकत घेवन सिटिझन्स फॉर डेमोक्रेसी संस्थेन विद्यापिठाच्या कुलसचिवांक पत्र बरयलांं.
संगणक विज्ञान विशयांत शिक्षकाचें एक पद भरपा खातीरची जायरात गोंय विद्यापिठान नोव्हेंबर 2021 वर्सा दिल्ली. ह्या जायराती उपरांंत मुलाखती जावंक ना. हाचे उपरांत ह्याच पदा खातीर एप्रील 2022 वर्सा दुसरे खेपे जायरात दिली. अर्ज आयले मात मुलाखती जावंंक ना. दोन वर्सा उपरांत जानेवारी 2024 वर्सा तिसरे खेपे जायरात जारी जाली. तीन खेपे जायरात जारी जाले उपरांत आतां 24 ते 26 एप्रील 2025 रोजी मुलाखती जातात. पयल्या आनी दुसऱ्या जायराती उपरांत जांणी अर्ज केल्ले, ते लेगीत मुलाखतीक पात्र आसात.
एका पदा खातीर वर्सा उपरांत तीन खेपे जायराती दिवप आनी मुलाखत वर्सा उपरांत घेवप, हाचे फाटलो हेत किदें, असो प्रस्न सिटिझन्स फॉर डेमोक्रेसी संंघटणेन केला. हाका लागून अर्ज केल्ल्या आनी पात्र उमेदवारांची निरशेवणी जाली. तांचेर मानसीक ताण आयलो. पयल्या जायराती उपरांंत साडेतीन वर्सांनी आनी निमाणें जायराती उपरांत वर्सान मुलाखत घेवप चुकीचें आसा. हाका लागून कांय पात्र उमेदवारांक अर्ज करपाची संद मेळूंक ना. हो तांचेर अन्याय आसा. कुलसचिवांनी ह्या प्रकाराची चवकशी करची आनी असले प्रकार बंद करपा खातीर कारवाय करची, अशी मागणी संंघटणेन निवेदन भेटोवन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
