भांगरभूंय | प्रतिनिधी
पणजी : गोंय वाटोवपा खातीर लोकचळवळ उबी करपाचो उलो निवृत्त न्या. फेर्दीन रिबेलो हांणी गोंयकारांक मारला. जमीन विक्रे विशीं खर उपाय करतना मांडवींतले कॅसिनो काडपा खातीर चळवळ उबारपाक आमी सहकार्य करपाक तयार आसा, अशें म्हणीत तांणी आपलो व्हट्सऍप नंबर शेअर केलो.
‘हांवें दिसाळ्यांत वाचलें, हरमला रान वाठारांतले उदरगती आड नागरिकांनी मोर्चा काडला. दोंगर, तळीं, न्हंयो, दयारदेगो आनी आमचे गांव वाटावपा खातीर हें आंदोलन पुराय गोंयांत लोकचळवळीन मुखार येवपाक जाय. आमकां सदांच फकत एका वरा खातीर उदक मेळटा, जाल्यार दुसरे कडेन शेकड्यांनी प्लॉट्स आनी जलतरण तळीं उबारतात. आमी सगले मेळून हे खातीर काम करपाक शकतात, अशें न्या. रिबेलो हांणी म्हणलें. म्हाका हे खातीर व्हॉट्सऍप करात असो उलो मारीत रेबेलो हांणी आपलो नंबर शॅर केला. ९८१९८३९२९२
न्या. फेर्दीन रिबेलो हांणी सुचयिल्लो लोकजाहीरनामो असो आसा:
१ : देंवती कितलीय आसूं, खंयच्याच दोंगरार उदरगती खातीर परवानगी दिवची न्हय.
२ : झोनिंग/वापर बदलाक परवानगी दिवपी सगले कायदे फाटल्या प्रभावा सयत रद्द करचे.
३ : जें उदरगतीचें काम मंजूर ना वा चालूच जावंक ना, अशे तरेच्या खंयचेच उदरगतीक परवानगी दिवची न्हय.
४ : सगलीं उदरगतीचीं कामां ‘पूर्वतपासणी तत्त्वा’प्रमाण आसचीं. सध्यातरी वा फुडाराकूय पर्यावरणाक लुकसाण जावचें ना, हें सिद्ध करपाची जापसालदारकी उदरगतीची आसची.
५ : गांवांत प्लॉटाचे उदरगती खातीर परवानगी दिवचे पयलीं त्या भागाचे वाहन तांकीचो अभ्यास करून अहवाल सादर करप सक्तीचें आसचें.
६ : फटींग अहवाल/नोंदी सादर करपी सगले अधिकारी, वास्तुविशारद आनी सर्व्हेअर हांचेर फौजदारी आनी शिस्तभंगाची कारवाय जावची.
७ : सीआरझेडांतली सगली बेकायदेशीर उदरगत पयलीं सील करची, सगले परवाने रद्द करून ते उडोवचे.
८ : मांडवी न्हंयेंतले सगले कॅसिनो काडचे.
गोंयचे जनतेन लोकचळवळ उभारची ह्या हेतान न्या. रिबेलो हांणी हें एक पावल उबारलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
