भांगरभूंय | प्रतिनिधी
पणजी: गोंय राज्य प्रदूशण नियंत्रण बोर्डान आवाजाच्या प्रदुशणाचेर खर कारवाय सुरू केल्या. सप्टेंबर २०२५ ते जानेवारी २०२६ ह्या काळांत मेळिल्ल्या ९०० परस चड आवाजाच्या कागाळीं विशीं केल्ल्या कारवायांचो अहवाल सादर करपाची सुचवणी गोंय पुलीस आनी जिल्लोधिकारी कार्यालयाक दिल्या.
आवाजाच्या प्रदुशणाचे कागाळीचेर प्रभावी अंमलबजावणी जावची, हे खातीर संबंदीत यंत्रणांक पत्रां धाडून आढावो घेवप चालू केलां. दयारदेग वाठारांतल्या ३८ ‘मॉनिटरिंग सिस्टीम’वरवीं आवाजाच्या प्रदुशणाचे ७५० नेम मोडिल्ल्याची नोंद जाल्या. हॅल्पलायन नंबर ८९५६४८७९३८ चेर १३५ कागाळी मेळ्ळ्यो, जाल्यार नागरिकांनी सरळ दाखल केल्ल्या ५० कागाळींचो हातूंत आसपाव आसा.
कांय प्रमाणांत पुलिसां कडल्यान अहवाल मेळिल्ल्यान ताचो आढावो घेवप सुरू आसा. उरिल्ल्या कागाळींचेर बेगोबेग कारवाय करपा खातीर जीएसपीसीबीन संबंदीत अधिकार्यां वांगडा जोड बसका घेवपाचें सुचयलां. आवाजाचें प्रदुशण नियंत्रण कायदो २००० खाला १७ आस्थापनांकडल्यान वट्ट १७ लाख रुपयांची लुकसाण भरपाय वसूल केली. २८ जणांक कारणां दाखयात नोटीस दिली.
नागरीक आवाजाच्या प्रदुशणा संबंदी कागाळी जीएसपीसीबीच्या अधिकृत वेबसायटीचेर वा ८९५६४८७९३८ ह्या हॅल्पलायन नंबराचेर संपर्क करून नोंद करपाक शकतात. नेम मोडप्यांचेर फुडेंय खर कारवाय करतले अशें बोर्डान स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
