भांगरभूंय | प्रतिनिधी
पणजी: गोंय राज्य प्रदूशण नियंत्रण मंडळान एक म्हत्वाचो आनी खर निर्णय घेतला. मंडळान गृहनिर्माण संकुलांतल्यान सरळ उक्त्यार घाणयारें उदक सोडिल्ल्याच्या गंभीर प्रकरणांची दखल घेतल्या. ज्या निवासी गृहनिर्माण संकुलांत 24 परस चड फ्लॅट्स आसात तांकां बेगोबेग घाणयारें उदक प्रक्रिया प्रकल्प स्थापन करप आतां सक्तीचें आसतलें. ज्या संकुलांची जोडणी पयलींच भौशीक घाणयारें उदकाच्या पायपांक जाल्या, अश्यांक ह्या नेमांतल्यान सवलत दिल्या.
निर्णया फाटलें कारण: भलायकी आनी उच्च न्यायालयाचे निर्देश
गोंय खंडपीठान 11 सप्टेंबराक दिल्ल्या आदेशा प्रमाण, प्रदूशण नियंत्रण मंडळान 7 ऑक्टोबराक जाल्ले बसकेंत हो निर्णय घेतला. मंडळाकडेन अश्यो जायत्यो कागाळी आयिल्यो. गृहनिर्माण संकुलांत बसयिल्ले एसटीपी प्रभावीपणान काम करिना वा ते बंद आसात, हाका लागून प्रक्रिया करूंक नाशिल्लें घाणयारें उदक उक्तडार सोडटात आनी हाका लागून भलायकेचो प्रस्न निर्माण जाता.
मंडळान नमूद केलें, खुबशे फावटीं बांदकाम वेवसायीक सुरवातेक एसटीपी सुरू करपाची परवानगी घेतात, मात फ्लॅट विकले उपरांत एसटीपीचो सांबाळ करिनात वा सोसायटीकडेन तें हस्तांतरीत करिनात. हाका लागून एसटीपी बंद पडटात.
बिल्डर्सां खातीर तीन वर्सां सांबाळप सक्तीचें
हे समस्येचेर कायमचो तोडगो काडपा खातीर प्रदूशण नियंत्रण मंडळान बांदकाम वेवसायिकां खातीर म्हत्वाचे नेम लागू केल्यात:
नव्या प्रकल्पां खातीर ’स्थापना/संचालन संमती’ (Consent to Establish and Operate) घेतना, बांधकाम वेवसायिकांक प्रकल्पांतल्या एसटीपीचो सांबाळ आनी संचालन तीन वर्सांच्या काळा खातीर वा एसटीपी सोसायटीकडेन अधिकृतपणान हस्तांतरीत जाय मेरेन करपाची अट सक्तीची आसतली.
ह्या तीन वर्सांच्या काळांत, सोसायटीच्या वा असोसिएशनाच्या ऑपरेटराक एसटीपी चलोवपाचें जाय तशें प्रशिक्षण दिवपाची जापसालदारकीय बिल्डरांचेर आसतली, जाका लागून संमती सोसायटीच्या नांवार हस्तांतरीत जालें काय एसटीपी योग्य तरेन चालूच उरतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
