भांगरभूंय | प्रतिनिधी
पर्यावरण मंत्र्यांच्या फुडारपणा खाला नवी समिती स्थापन
भांगरभूंय। प्रतिनिधी
पणजीः गोंय राज्य जैविविधताय मंडळाची पुर्नरचणूक जातली. पर्यावरण मंत्री आलेक्स सिक्वेरा हांचे फुडारपणा खाला मंडळाची नवीन समिती स्थापन जातली. तिचो कार्यकाळ तीन वर्सां खातीर आसतलो, हे विशींची अधिसुचोवणी पर्यावरण आनी हवामान बदल खात्यान काडल्या.
अधिसुचोवणी प्रमाण जैविक विविधताय कायदो 2002, जो 2023 सात सुधारीत जाल्लो तांचे कलम 22 खाला गोंय सरकार गोंय राज्य जैवविविधताय मंडळाची फेररचना करतले आनी राजपत्रांत हे विशींची अधिसुचोवणी उजावाडाक आयले उपरांत ही समिती कार्यरत जातली. पर्यावरण मंत्री आलेक्स सिक्वेरा यांचे अध्यक्षते खाला 14 वांगडी समितीत 7 पदाधिकारी वांगडी आनी 7 तज्ञ वांगडी आसतलें.
अतिरीक्त रान प्रधान मुखेल रान संरक्षक, उदका स्रोत खात्याचे मुखेल अभियंते, शेतकी संचालक, पर्यावरण आनी हवामान बदल खात्याचे संचालक, पंचायत संचालक आनी आदिवासी कल्याण खात्याचे संचालक, पदाधिकारी वांगडी पदार आसतले. जाल्यार, हळदणचे नेल्सन फिगेर्दो, बांबोळेचे प्रा. एम. के. जर्नाथनम, पर्यावरण मोगी राजेंद्र केरकार, कार्मेल महाविद्यालयाचे डॉ. मनोज बोरकार आयसीएआरचे संचालक डॉ. प्रवीण कुमार, वनस्पती शास्त्रज्ञ डॉ. अक्षता फर्नांडीस आनी डॉ. प्रदीप सरमोकादम हे तज्ञ वांगडी आसतले.
हे विशींची अधिसुचोवणी राजपत्रांत उजावाडाक आयले उपरांत हे समितीची कार्यकाळ तीन वर्सां खातीर सुरू जातलो. समितीच्या संदर्भातल्यो अटी, अर्थीक खाती आनी ऑडीटाचे तपशील, अधिकार आनी कार्य हे जैविक विविधताय कायदो 2002 खाला निर्दीष्ट केल्यात. सरकारी नियमा प्रमाण मानधन, टीए, डीए फावो जातले, अशें पर्यावरण खात्याचे संचालक जॉनसन फर्नांडीस हांणी अधीसुचोवणेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
