गोंय राज्य जैवविविधताय संवर्धन पुरस्कार जाहीर

भांगरभूंय | प्रतिनिधी

पणजी ः गोंय राज्य जैवविविधताय मंडळान जैवविविधताय, पर्यावरण आनी पर्यावरण संवर्धन मळा वयल्या तोखणायेच्या वावरा खातीर 2024 वर्सा खातीर गोंय राज्य जैवविविधताय संवर्धन पुरस्कारांची घोशणा केली.
ह्या वर्सा हे पुरस्कार पाच श्रेणींत भेटयतले. सर्वोत्तम जैवविविधताय वेवस्थापन समिती (उत्तर आनी दक्षीण गोंय) दरेकी 50,000 रुपया, वैयक्तिक श्रेणींत उत्तर आनी दक्षीण गोंयांतल्यान दरेकी एका व्यक्ती खातीर 25,000 रूपया, जैवविविधताय उत्साही श्रेणींत उत्तर आनी दक्षीण गोंयांतल्यान दरेकी एका व्यक्ती खातीर 15,000 रूपया, वेव्हारीक जैवविविधताय संशोधक श्रेणींत 25,000 रूपया, हरित पत्रकारिता श्रेणींत 25,000 तशेंच विशेश प्रशंसा पुरस्कार श्रेणींत प्रत्येकी 10,000 रुपया रक्कमेचे पुरस्कार दितले.
सर्वोत्तम जैवविविधताय वेवस्थापन समिती श्रेणींत पिळगांव जैवविविधताय वेवस्थापन समिती आनी बांदोड्यां जैवविविधताय वेवस्थापन समितीक जाल्यार विशेश श्रेणींत चांदर, केळशी आनी वेर्णा बीएमसी हांका पुरस्कार जाहीर जाला.
वैयक्तिक श्रेणींत निवृत्त कृशी उपसंचालक विठ्ठल अनंत जोशी (उत्तर गोंय) आनी निवृत्त सरकारी कर्मचारी आनी उत्साही फळ उत्पादक दत्ताराम गोपाळ सरदेसाय (दक्षीण गोंय) हांका पुरस्कार जाहीर जाला.
तोखणाय श्रेणींत (वैयक्तिक) आनंद मेळेकार (उत्तर गोंय), लीलावती उसगांवकार, नावो पावणो आनी फा. सिरियाक जेम्स (दक्षीण गोंय) हांका पुरस्कार जाहीर जाला.
जैवविविधताय उत्साही श्रेणींत गोमंतक गौसेवक महासंघाचे अध्यक्ष कमलाकांत सावळो तारी आनी गोंय वैजकी म्हाविद्यालयांत सध्या कार्यरत आशिल्लें देवेश नायक हांकां पुरस्कार जाहीर जाला.
उत्साही श्रेणींत तोखणाय पुरस्कार जहीर करमली आनी दुमिंग आर्केडिओ फर्नांडिस (उत्तर गोंय) आनी राजेंद्र वेळीप, रॉय बार्रेटो, नेस्टर फर्नांडिस आनी पियो प्रॅक्सेडीस ज्युलिओ काद्रोस (दक्षीण गोंय) हांका जाहीर जाला.
तोखणाय जैवविविधताय संशोधक श्रेणींत गोपीनाथ विष्णू गावस, मांगिरिश धारवाडकार आनी राहुल कुलकर्णी हांका पुरस्कार जाहीर जाला.
हरित पत्रकारिता श्रेणींत फोटो पत्रकार गणेश शंकर शेटकार हांकां आनी तोखणाय श्रेणींत वहाब खान, आरती दास आनी सुभाष महाले हांका पुरस्कार जाहीर जाला.
बीएमसीचे कार्य सुलभ करपा खातीर तोखणायेचो वावर करपी सचीव वा अध्यक्ष वा सक्रिय वांगडी म्हूण प्रमाणपत्र, स्मृतिचिन्ह आनी रोख 5,000 रूपयांचो पुरस्कार नितीन सावंत (सचीव, नेवरा बीएमसी), अंकिता देसाय (सचीव, कुडतरी बीएमसी), प्रिया आल्मेदा (अध्यक्ष, नावेली बीएमसी), विनय तुबकी (अध्यक्ष, श्रीस्थळ बीएमसी), नंदा माजिक (अध्यक्ष, केरी- सत्तरी बीएमसी), युसेबियो ब्रागांझा (सचीव, राय बीएमसी), महेश वायंगणकार (अध्यक्ष, हरमल बीएमसी), अल्विटो डिसिल्वा (अध्यक्ष, पोम्बुर्पा बीएमसी), नरेश शिगांवकार (सदस्य, कुळे बीएमसी), योगीराज गोसावी (फोंडें नगरपालिका), क्षितीजा नायक (सचीव, मळकर्णे बीएमसी), देविदास वेळीप (अध्यक्ष, बार्शे केपें बीएमसी) हांकां जाहीर जाला.
जैवविविधताय क्षेत्रातल्या योगदाना खातीर विशेश सन्मान (प्रमाणपत्र आनी स्मृतिचिन्ह) दीपक परब, सखाराम परब, वैजयंती प्रभुगांवकार, अ‍ॅड. शशिकांत नायक हांकां जाहीर जाला.