गोंय राज्य गिरायक हक्क संरक्षण मंडळाची बसका जाली

भांगरभूंय | प्रतिनिधी

गोंयांत गिरायक संरक्षण कायदो मजबूत करपाच्या विशयाचेर चर्चा

पणजीः गोंय राज्य गिरायक हक्क संरक्षण मंडळाची दुसरी बसका नागरी पुरवण आनी गिरायक वेव्हार मंत्री रवी नायक हांचे अध्यक्षते खाला आयज पर्वरे मंत्रालयांत जाली.
बसकेक नागरी पुरवण आनी गिरायक वेव्हार खात्याचे सचीव संजीत रॉड्रिग्ज, आयएएस, गोंय राज्य गिरायक संरक्षण मंडळाचे वांगडी सचीव आनी नागरी पुरवण आनी गिरायक वेव्हार खात्याचे संचालक जयंत जी. तारी आनी मंडळाचे हेर सदस्य हाजीर आशिल्लें.
नागरी पुरवण आनी गिरायक वेव्हार खात्याचे सचीव संजीत रॉड्रिग्ज हांणी गिरायकांच्या हक्कांचे संरक्षण आनी समर्थन करप ही दरेकाची जापसालदारकी आशिल्ल्याचें सांगून सगळ्या संबंदीत यंत्रणांनी योगदान दिवपाची गरज उक्तायली.
बसकेत गोंयांत गिरायक संरक्षण कायदो मजबूत करपाच्या विशयाचेर चर्चा जाली. मंडळाच्या वांगड्यांनी जायत्यो मोलादीक सुचोवण्यो केल्यो. गिरायक हक्क संरक्षण कायद्याच्या नेमांची अंमलबजावणी, गोंय राज्या खातीर थेट विक्री देखरेख प्राधिकरण यंत्रणा नेम निश्चीत करप, राज्य आयोग आनी जिल्हो आयोगां संबंदीत प्रशासकीय मुद्दे, गोंयांत बीआयएसचे उपकार्यालय, मंडळा खातीर भोंवतो पंगड, दक्षीण गोंया खातीर गिरायक तडजोड समिती स्थापना अशां साबार विशयांचेर चर्चा जाली.
सुरवातेक गिरायक विभागाचे सहाय्यक संचालक केतन फळदेसाय हांणी गिरायक हक्क संरक्षण कायदो 2019 विशीं म्हायती दिली. भारतीय मानक ब्युरोचे सहाय्यक संचालक आशुतोष अग्रवाल हांणी भारतीय मानक ब्युरोची भूमिका आनी जापसालदारकी, कार्य आनी ऑनलायन कागाळ नोंद करपा खातीर बीआयएस अॅपा विशीं म्हायती दिली. राष्ट्रीय तपासणी संस्थेचे शास्त्रज्ञ अजय उक्रांडे हांणी विविध अभियांत्रिकी साहित्य आनी तयार उत्पादनांची चाचणी, मूल्यांकन आनी गुणवत्ता नियंत्रण आनी संस्थेच्या हेर कार्याची म्हायती दिली. मंडळाचे वांगडी अ‍ॅड. यतिश नाईक हांणी गोंय राज्या खातीर विशिश्ट गिरायक संरक्षण नेम अधिसूचित करपा खातीर एक उपसमिती स्थापन करपाचो प्रस्ताव मांडलो.
रोलँड मार्टिन्स हांणी जिल्हो पुलीस-सायबर गुन्यांव विभाग, आरबीआय गोंय कार्यालय, कदंब म्हामंडळ, उदका पुरवण विभाग, एलपीजी एजन्सीचे प्रतिनिधी, डब्ल्यूआरडी, उजो पालोवपी दळ आनी आपत्कालीन सेवा संचालनालय हांका मंडळाचे सदस्य करपाची सुचोवणी केली.
नागरी पुरवण निरीक्षक प्रियंका कुडणेकार हांणी बसकेचे सूत्रसंचालन केलें. नागरी पुरवण आनी गिरायक वेव्हार खात्याचे संचालक जयंत जी. तारी हांणीय मंडळाच्या वांगड्यां बरोबर चर्चेत वांटो घेतलो.