भांगरभूंय | प्रतिनिधी
खासदार विरियातो फर्नांडीस हांची म्हायती
भांगरभूंय । प्रतिनिधी
पणजी : गोंयची जमीन आनी वळख राखपा खातीर संसदेंत संविधान सुदारणां विधेयक 2025 मांडलां. ह्या विधेयका वरवीं गोंय राज्या खातीर अनुच्छेद 371 (I) सुदारणां करून गोंय शाश्वत उदरगत मंडळाची स्थापना करतले. खंयचेंय सरकार आसूं ताका ह्या मंडळान घेतिल्ल्या निर्णयाक बांदील रावचें पडटलें, अशी म्हायती दक्षीण गोंय खासदार विरियातो फर्नांडीस हांणी दिल्ली.
दिल्ली काँग्रेस मुख्यालयांत आपयिल्ले पत्रकार परिशदेंत विरियातो उलयताले. ह्या वेळार गोंय काँग्रेस प्रभारी माणीकराव ठाकरे आनी गोंय काँग्रेस प्रदेशाध्यक्ष अमित पाटकार हजर आशिल्ले.
केंद्रांत 12 वर्सां आनी गोंयांत 14 वर्सां भाजपच्या डबल इंजीन सरकारान व्हडा प्रमाणांत गोंयचो विनाश केला, असो आरोप फर्नांडीस हांणी केलो.
न्हंयांचें राष्ट्रीयकरण करून आमच्यो स न्हंयो व्हेल्यो आनी 2020त लॉकडावनाच्या वेळार आमकां घरा रावात म्हूण सांगून कोळश्याची येरादारी करपा खातीर तीन लिनियर प्रकल्प हाडले. फक्त कोळसो हातळपा खातीर मुरगांव बंदर ट्रस्टाचें नांव बदलून मुरगांव बंदर प्राधिकरण केलें, अशी टिका विरियातो हांणी केलो.
केंद्रांत आशिल्लें भाजप सरकार आमची सुवात, दोंगर, भाटां, खाजनां आनी आदिवासीच्यो जमनी बळकावपाक सोदता आनी संविधान सुदारणा विधेयक 2025 मांडून आमी आमच्यो जमनी, दोंगर आनी न्हंयो परतून घेवपाचो यत्न करपाक सोदतात, अशें विरियातो हांणी सांगलें.
संविधानाचो अनुच्छेद 371 खाला गोंयाक आपली वळख आनी जमीन राखून दवरपाचो हक्क आसा आनी 371 (ख) ह्या कलमा खाला गोंय राज्याचो आस्पाव आसा. ह्या कलमाची 371 (I) (A) म्हण दुरुस्ती करून संविधानीक गॅरंटी गोंया खातीर दितले. ह्या नव्या कलमा खाला शाश्वत उदरगत मंडळ स्थापन करतले, अशी म्हायती विरियातो हांणी दिली.
आमी 5डिसेंबर 2025त हें विधेयक संसदेंत दाखल केलां. कांय काळा उपरांत हें विधेयक लोकसभा आनी राज्यसभेंत समंती खातीर येतलें. ह्या विधेयकाक तेंको दिवपा खातीर आमी सगल्या विरोधी पक्षा वांगडा चर्चा करतात, अशें विरियातो हांणी सांगलें. गोंयचे जनतेच्यो ज्यो समस्या आसात त्यो सुटाव्यो करपाची जापसालदारकी केंद्र सरकाराक घेवची पडटली. केंद्रांत आनी गोंयांत भाजप सरकार आसा. मात दोनूय सरकारांनी गोंयच्या समस्यांचेर आडनदर केल्या. गोंयचें घट्टण तांचे नदरे मुखार दिसता, पूण कसलीच उपाय येवजण सरकार करपाक सोदिना, असो आरोप ठाकरे हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
