भांगरभूंय | प्रतिनिधी
खासदार विरीयातो फर्नांडीस हांची म्हायती
पणजीः गोंयची जमीन आनी वळख राखपा खातीर संसदेंत संविधान सुदारणां विधेयक २०२५ मांडलां. ह्या विधेयका वरवीं गोंय राज्या खातीर अनुच्छेद ३७१ (I) सुदारणां करून गोंय शाश्वत उदरगत मंडळाची स्थापना करतले. खंयचेंय सरकार आसूं ताका ह्या मंडळान घेतिल्ल्या निर्णयाक बांदील रावचें पडटलें, अशी म्हायती दक्षीण गोंय खासदार विरीयातो फर्नांडीस हांणी दिल्ली.
दिल्ली कॉंग्रेस मुख्यालयांत आपयिल्ले पत्रकार परिशदेंत विरीयातो उलयताले. ह्या वेळार गोंय कॉंग्रेस प्रभारी माणीकराव ठाकरे आनी गोंय कॉंग्रेस प्रदेशाध्यक्ष अमित पाटकार हजर आशिल्ले.
केंद्रांत १२ वर्सां आनी राज्यांत १४ वर्सां भाजपच्या डबल इंजीन सरकारान व्हडा प्रमाणांत गोंयचो विनाश केला, असो आरोप फर्नांडीस हांणी केलो.
न्हंयांचे राष्ट्रीयकरण करून आमच्यो स न्हंयो व्हेल्यो आनी २०२०त लोकडावनाच्या वेळार आमकां घरा रावात म्हण सांगून कोळश्याची येरादारी करपा खातीर तीन लिनियर प्रकल्प हाडले. फक्त कोळसो हातळपा खातीर मुरगांव बंदर ट्रस्टाचें नांव बदलून मुरगांव बंदर प्राधिकरण केलें, असो फारपेट फर्नांडीस हांणी केलो.
केंद्रांत आशिल्लें भाजप सरकार आमचो जागो, दोंगर, भाटा, खाजना आनी आदिवासीच्यो जमनी बळकावपाक सोदता आनी संविधान सुदारणा विधेयक २०२५ मांडून आमी आमच्यो जमनी, दोंगर आनी न्हयो परत घेवपाचो यत्न करपाक सोदतात, अशें फर्नांडीस हांणी सांगलें.
संविधानाचे अनुच्छेद ३७१ खाला राज्याक आपली वळख आनी जागो राखून दवरपाचो हक्क आसा आनी ३७१ (ख) ह्या कलमा खाला गोंय राज्याचो आस्पाव आसा. ह्या कलमाची ३७१ (I) (A) म्हण दूरूस्ती करून संविधानीक गॅरंटी राज्या खातीर दितले. ह्या नव्या कलमा खाला शाश्वत उदरगत मंडळ स्थापन करतले, अशी म्हायती फर्नांडीस हांणी दिली.
आमी ५ डिसेंबर २०२५त हें विधेयक संसदेंत दाखल केलां. कांय काळा उपरांत हें विधेयक लोकसभा आनी राज्यसभेंत समंती खातीर येतलें. हे विधेयकाक तेंको दिवपा खातीर आमी सगळ्या विरोधी पक्षा वांगडा चर्चा करतात, अशें फर्नांडीस हांणी सांगलें.
गोंयचे जनतेच्यो ज्यो समस्या आसात त्यो सुटावो करपाची जापसालदारकी केंद्र सरकाराक घेवची पडटली. केंद्रांत आनी राज्यांत भाजप सरकार आसा. मात दोनय सरकारांनी राज्याच्या समस्येचेर आडनदर केल्या. गोंयचें घट्टण तांचे नदरे मुखार दिसता पुण कसलीच उपाय येवजण सरकार करपाक सोदिना, असो आरोप ठाकरे हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
