भांगरभूंय | प्रतिनिधी
पणजीः आझादी का अमृत महोत्सवा निमतान राज्यांत विवीध सुवातांचेर तिरंग्याच्या रंगाची रोशणाय केल्या. अंजुणें धरण, साळावली धरण, दूरदर्शन टॉवर, कुडचडें रवीन्द्र भवन, पोरणें गोंय चर्च तशेंच हेर विवीध वाठारांनी इमारतींचेर तिरंग्याच्या रंगाची रोशणाय केल्या. ताका लागून पुराय गोंय तिरंग्याच्या रंगांनी रंगलां आनी राज्यभरांत स्वातंत्र्यांची उमेद दिसता.
देशभरांत आझादी का अमृत महोत्सव सगळ्या वाठारांनी मनयतात. ताचोच एक भाग म्हूण गोंय सरकारान विवीध अशे उपक्रम हातांत घेतल्यात. 13 ते आयज 15 ऑगस्ट अशे तीन दीस सगळ्याक रोशणाय केल्या. खूबशा लोकांक थंय वचून फोटो काडपाचो मोह सांबाळूंक जालो ना. रातच्या वेळार ह्या तिरंग्याच्या रंगाची विद्यूत रोशणाय दोळ्यांत भरता. आझादी का अमृत महोत्सवा निमतान दर घरांनी तिरंगो लायला. तशेंच गाडयांचेरूय तिरंगे लायल्यात. सगळे कडेन स्वातंत्र्याची रॅली काडटात. खूब कडेन स्वातंत्र्य दिसा निमतान प्रदर्शनां मांडल्यात. फाटल्या तीन दिसा सावन हो स्वातंत्र्याचो उत्सव चालू आसा. आयज 15 ऑगस्टाक साबार वाठारांनी स्वातंत्र्य दिसाच्यो कार्यावळी जातल्यो. खूबशा सरकारी कार्यालयांचेर, सरकारी बंगल्यांचेर विद्यूत रोशणाय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
