भांगरभूंय | प्रतिनिधी
पणजी : अॅप आदारीत टॅक्सी सेवा सुरू करपाक सरकारान जारी केल्ल्या गोंय येरादारी अग्रिगेटर नेम २०२५ क राज्यांतल्या विवीध उद्देगीक संघटणांनी तेंको दिलां. गोंय चेंबर ऑफ कॉमर्स अँड इंडस्ट्रीचो (जीसीसीआय), गोवा स्टेट इंडस्ट्रीज असोसिएशन, वेर्णा इंडस्ट्रीज असोसिएशन, लघु उद्योग भारती, गोवा टेक्नॉलॉजी असोसिएशन अशो विवीध संघटणा हातूंत आसात. हे सेवेक लागून सामान्यां सयत उद्देग मळाक फायदो जातलो अशें मत ह्या तांणी उक्तायलां.
हे विशीं जीसीसीआयन काडिल्ल्या पत्रकांत म्हणलें, अॅप-आधारीत टॅक्सी सेवा आतां लक्झरी रावूंक नाशिल्ल्यान ती एक गरज जाल्या. उद्देग क्षेत्राची उत्पादकताय नेमान केल्ली अॅपआधारीत टॅक्सी सेवा नक्की फायद्याची थारतली. राज्यांतलें पर्यटन, उत्पादन, रिअल इस्टेट, किरकोळ विक्री, लॉजिस्टिक्स वा हेर सेवा वाठारांतल्या वेवसायांक अॅप टॅक्सीचो विस्वासू आनी सुरक्षीत येरादारी पर्याय उपेगी थारतलें.
अशी सेवा गरजेची सुविधा हाडटा, कामगारांची कार्यक्षमताय वाडयता आनी वेवसाय सुलभताय सुधारून राज्यांत अदीक गुंतवणूकदार अनुकूल वातावरण तयार करता. नव्या नेमांनी डिजिटल येरादारी सक्षम करून थळावे उपजीविकेचें संरक्षण करता. हातुंतल्या चालकांक सरकार-अधिसुचीत भाडें पुराय दिवप, भलायकी विमाी, वाहन अनुदान तरतुदी म्हत्वाच्यो. अॅप टॅक्सीक लागून खाजगी वाहनांचेर अवलंबित्व उणें जातलें. हाका लागून रहदारी उणी जावप, प्रदूशण उणें जावपाक मजत जातली.
एसोचॅमचो येवकार
ASSOCHAM न गोंय ट्रान्सपोर्ट अॅग्रीगेटर मार्गदर्शक सुचोवण्यांक येवकार दिला. गोंयच्या येरादारी मळाक सुसंगत करपाचे नदरेन सरकारान उखलिल्लें हें सकारात्मक पावल अशी प्रतिक्रिया सह अध्यक्ष डाॅ. सागर साळगांवकार हांणी दिल्या. शार आनी उपनगरां मदली येरादारी जोडणी सुदारुन प्रादेशीक संतुलीत उदरगती वेग येतलो, तशेंच नव्या वेवसायीक गुंतवणुकीक संद मेळटली, अशेंय तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
