भांगरभूंय | प्रतिनिधी
पणजी ः कोंकणी भाशा मंडळ गोंय आयोजीत 26 व्या गोंय युवा महोत्सवाचे कार्याध्यक्ष म्हणून कलानंद उर्फ अनंत श्रीधर कामत बांबोळकार हांची निवड जाल्या. हो गोंय युवा महोत्सव 25 आनी 26 जानेवारीक नारायण झांटये वाणिज्य म्हाविद्यालय, दिवचल आनी युवा जैतीवंत, दिवचल पंगडाच्या जोड पालवान नारायण झांटये वाणिज्य म्हाविद्यालयांत जातलो.
कलानंद हे वेवसायान शिक्षक, तशेंच चित्रकार. बांदोडेंच्या आर. पी. आर. एस. हायस्कुलांत ते चित्रकलेचे शिक्षक म्हणून काम करतात. साबार पुस्तकांचीं मुखपृश्ठां तांणी रंगयल्यांत. वेवसायीक रंगमाचयेर नाट्य कलाकार तशेंच दिग्दर्शक म्हणून तांची वळख आसा. कला अकादमीचे नाट्य सर्तींत उत्कृश्ट अभिनय, दिग्दर्शनाचीं इनामां तांकां फावो जाल्यांत. ‘अंत्रुज घुडयो’ सारके संस्थेंतल्यान तांणी गोंय युवा महोत्सवांत मोलादीक कामगिरी केल्या तशेंच ह्या पंगडाच्या जैतांत तांचें व्हड योगदान आसा. कोंकणी चळवळीच्या सक्रीय कार्यकर्त्यां मदीं तांची वळख आसा, अशें कोंकणी भाशा मंडळान कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
