भांगरभूंय | प्रतिनिधी
अरविंद भाटीकारः रमेश कोमरपंत हांकां भेटयलो डॉ. सुश्रुत मार्टिन्स यादस्तीक पुरस्कार
पणजी: शेजारच्या महाराष्ट्र वा कर्नाटका परस गोंयांत बार्रांचें प्रमाण चड म्हणल्यार 8 हजार लोकां फाटल्यान एक बार अशें आसा. नायट क्लबाची तजवीज नासतना लेगीत 200 नायट क्लब चलतात. उदरगतीच्या नांवा खाला पर्यावरण तशेंच संस्कृती नश्ट जावपाचे वाटेर आसा. हे फाटभुंयेर निवृत्त न्यायाधीश फेर्दीन रिबेलो हांच्या आवाहना प्रमाण गोंय वाटावपा खातीर गोंय मुक्ती, जनमत कौला भशेन जनआंदोलन जावपाची गरज साहित्यीक आनी समाज वावुरपी अरविंद भाटीकार हांणी उक्तायली.
पर्वरे थॉमस स्टिफन्स कोंकणी केंद्रांत डॉ. सुश्रुत मार्टिन्स यादस्तीक पुरस्कार भेटवण सुवाळ्यांत मुखेल सोयरे ह्या नात्यान ते उलयतालें. रमेश कोमरपंत हांकां डॉ. सुश्रुत मार्टिन्स यादस्तीक पुरस्कार भेटयलो. साहित्यीक अॅड. उदय भेंब्रे कार्यावळीचे अध्यक्ष आशिल्ले जाल्यार पांडुरंग फळदेसाय मानाचे सोयरे म्हूण हाजीर आशिल्ले. थॉमस स्टिफन कोंकणी केंद्र आनी संजना पब्लिकेशन हांणी कार्यावळीचें आयोजन केल्लें.
गोंयांत पुर्तुगेजांची राजवट आशिल्ली. पुर्तुगेजांक धांवडावन गोंय मुक्त करपा खातीर जनआंदोलन जालें. हाका लागून 19 डिसेंबर 1961 दिसा गोंय मुक्त जालें. हाचे उपरांत गोंयचे स्वतंत्र अस्तित्व तिगोवन दवरपा खातीर लेगीत ओपीनीयन पोला वतीन आंदोलन जालें. ओपीनीयन पोलाक लागून गोंयचे स्वतंत्र अस्त्वित्व उरलें. आता कॅसिनो, नायट क्लब, बार्रां हाका लागून गोंयची संस्कृती नश्ट जाता. जमीन विक्री, जमनीचें रुपांतरण, बेकायदाे बांदकामां हाका लागून पर्यावरण नश्ट जावपाक लागलां. हे फाटभुंयेर आदले न्यायाधीश फेर्दीन रिबेलो हांणी जनआंदोलन उबारपाचो उलो मारला. तांणी मारिल्लो उलो योग्य आसा. गोंय वाटावपा खातीर जनआंदोलन उबें रावपाची गरज आसा, अशें अरविंद भाटीकार हांणी ह्या वेळार उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
