भांगरभूंय | प्रतिनिधी
सावियो कुतिन्होः मडगांवां ओंपली डॉ. राम मनोहर लोहिया हांकां आर्गां
भांगरभूंय । प्रतिनिधी
मडगांवः डॉ. राम मनोहर लोहिया म्हान क्रांतीकारक आशिल्ले. तांचे जयंती निमतान गोंयकारांनी आनी मडगांवकारांनी लोकशायेचीं सगळीं तत्वां पांयां पोंदा मस्तुपी सुवार्थी तशेंच सत्तेक भुकेल्ल्या राजकारण्यां पासून स्वताक आनी गोंयाक मुक्त करचे खातीर एके नवे क्रांती खातीर तयार रावचें, असो उलो काँग्रेसीचे सावियो कुतिन्हो हांणी मारलो.
डॉ. राम मनोहर लोहिया हांचे 115 जयंती निमतान मडगांव काँग्रेस गट समिती आनी लोकांनी तांकां फुलांचो ङार घालून आर्गां ओंपलीं. ह्या वेळार सावियो कुतिन्हो हांचे सयत नीक कोलाको, डॉ. रोझलीन परेरा. अॅड. स्नेहल ओंसकार, राधा कवळेंकार, चार्ल्स रॉड्रिग्स, रॉबर्ट वाझ, अन्वर नारू, लेस्ली परेरा, रवींद्र जॉर्ज, लालन पार्सेकार, सुजाता पार्सेकार, दामोदर ओंसकार, अनीस तन्वर, लोएला रॉड्रिग्स हाजीर आशिल्ले. गोंयाक पुर्तुगेज राजवटी पासून मुक्त करचे खातीर डॉ. राम मनोहर लोहिया हांणीच कीट पेटयली, हें दरेका गोंयकाराक खबर आसा. मात सध्या भ्रश्टाचारी लोभी राजकारण्यां कडल्यान गोंयचें घट्टण जाता. हुकूमशायेचो कारभार हाका लागून गोंयची सध्याची स्थिती पळयत जाल्यार स्वातंत्र्यसैनिकांनी आपलें रगत वारायलें आनी प्राणांची आहुती दिली ती हेच खातीर काय कितें, असो प्रस्न पडटा, अशें कुतिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
