भांगरभूंय | प्रतिनिधी
केंद्रीय मंत्री नितीन गडकरी हांची राज्यसभेंत लेखी जाप
पणजी: गोंय-मुंबय चारपदरी राष्ट्रीय म्हामार्ग 66 चें वट्ट काम 500 किलोमिटराचें आसा. हातूंतलें 463 किलोमिटराचें काम पुराय जाला. 24 किलोमिटराचें काम करपाचें उरलां. उरिल्लें काम सप्टेंबर 2025 मेरेन पुराय करपाचेर लक्ष आसा, अशी म्हायती केंद्रीय रस्ते येरादारी आनी म्हामार्ग मंत्री नितीन गडकरी हांणी राज्यसभेंत दिल्ले लेखी जापेंतल्यान मेळ्ळी. हे विशीं खासदार सदानंद शेट तानावडे हांणी अतारांकीत प्रस्न विचारिल्लो.
जापेंत दिल्ले म्हायती प्रमाण गोंय (पणजी) ते मुंबय (पनवेल) राष्ट्रीय म्हामार्गाचें चारपदरीकरण विवीध टप्प्यांत करतात. हातूंत वट्ट 14 प्रकल्पांचेर काम सुरू आसा. हातूंतल्या पयल्या टप्प्यांतलें पुणें ते इंदापूर हें काम डिसेंबर 2011 वर्सा सुरू जाल्लें. हे खातीर तेन्ना 14 हजार 106 कोटी रुपया मंजूर केल्ले. कंत्राटदारा कडेन फावोशें भांडवल नासप, जमनी संपादन आनी बांदकामां संबंदी आनी हेर समस्यांक लागून ह्या म्हामार्गाचें काम रखडिल्लें.
अशें आसलें तरी म्हामार्गाच्या बांदकामांत संबंदीत सगल्या प्रलंबीत प्रस्नाचेर राज्य सरकारां कडेन चर्चा करून ते सोडयल्यात. हो पुराय प्रकल्प पुराय करपा खातीर सुधारीत खर्च 19 हजार 469 कोटी रुपया जातलो.
गोंय-बेळगांव म्हामार्गाक अजून स वर्सां
राज्यसभेंतल्या आनीक एका प्रस्नाचे जापे प्रमाण गोंय (पणजी) ते बेळगांव राष्ट्रीय म्हामार्ग 748 पुराय जावपाक मार्च 2031 मेरेनचो काळ लागतलो. हो म्हामार्ग 153 किलोमिटर लांबायेचो आसा. सद्या 112 किलोमिटरा खातीर मंजुरी मेळ्ळ्या. सद्या हातूंतलें 60 किलोमिटराचें काम पुराय जालां आनी 52 किलोमिटराचें काम सुरू आसा. हें काम डिसेंबर 2028 मेरेन पुराय जातलें. उरिल्लें 41 किलोमिटराचें काम हें गोंयांत जातलें. हे खातीर जमीन संपादन आनी पर्यावरणीय दाखले घेतले. उपरांत हें काम पुराय करपा खातीर मार्च 2031 मरेनचें लक्ष दवरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
