भांगरभूंय | प्रतिनिधी
गोंयच्या अंदूंच्या रणजी हंगामाचे मोहिमेची सुरवात आयज सावन पर्वरीच्या पीसीएचेर जावपी मणिपूर पंगडा आडचे मॅची वरवीं जाता. फाटल्या क्रिकेट हंगामांत बाबत कामगिरीक लागून गोंयची प्लेट गटांत घसरण जाल्या.
अंदूं ह्या गटांतली पयली सुवात मेळोवन परतून एकदा एलीट गटांत वचपाचो गोंयच्या पंगडाची अंदूंची मोख आसतली. मणिपूर आनी सिक्कीम ह्या पंगडां आडच्या मॅचीं खातीर गोंयान आपलो 16 वांगड्यांचो पंगड जाहीर केला. पयल्या दोन मॅचीं खातीर पंगडांत कश्यप बखले, शुभम तारी, राहुल मेहता आनी किथ पिंटो ह्या नवीन चेऱ्यांक सुवात दिल्या जाल्यार ऋत्विक नायकान पंगडांत पुनरागमन केलां.
मणिपूर पंगडा आडचे मॅची खातीर शुभम तारीक रणजी क्रिकेटींत पदार्पण करपाची संद आसा. अर्जुन तेंडुलकर पुर्ण तंदुरुस्त नाशिल्ल्यान ताचे सुवातेर शुभमाक संद मेळुये. हेरंब परब आनी ऋत्विक नायक फास्ट बॉलींग विभाग सांबाळटले. गोंयाक प्लेट गटांतल्यान भायर सरपाक दरेक मॅच जिखपाक जाय. सध्या गोंयांत पावस चालू आशिल्ल्यान ती एक व्हड समस्या गोंया मुखार आसा.
पीसीएची खेळपट्टी पुराय धांपिल्ली आसली तरी आवटफिल्ड ही समस्या आसा. गोंयाक खेळपा खातीर मेळिल्ल्या वेळाचो चडांतचड उपेग करचो पडटलो.
मणिपूर पंगड मंगळार गोंयांत पावलो. फाटल्या दोन दिसां सावन तांणी खर सराव केला. रणजी हंगामा पयलीं गोंयचो पंगड पयलीं अलूर हांगा आनी उपरांत चंदीगडांत सराव केला आनी मॅची खेळ्ळा.
गोंयचो पंगडः दर्शन मिशाळ (मुखेली), सुयश प्रभुदेसाय, रोहन कदम, मंथन खुटकार, स्नेहळ कवठणकार, के व्ही सिद्धार्थ, कश्यप बखले, समर दुभाषी, मोहीत रेडकार, अर्जुन तेंडुलकर, हेरंब परब, शुभम तारी, ऋत्विक नायक, दिपराज गांवकार, राहुल मेहता आनी कीथ पिंटो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
