भांगरभूंय | प्रतिनिधी
भांगरभूंय । खबरां मेज
पणजीः कोरोना म्हामारीचो प्रभाव उणो जाल्ल्यान देशांतले पर्यटक गोंयांत आतां येवपाक लागल्यात. गुजरातच्या पर्यटकांक गोंयां कडेन चड आकर्शीत जाल्यात अशें दिसपाक लागलां. गोंय पर्यटन खातें आनी गोंय पर्यटन उदरगत म्हामंडळ गोंयचें इको टुरिझम, सांस्कृतीक पर्यटन, दायज पर्यटन आनी वेलनेस पर्यटनां कडेन पर्यटकांक आकर्शीत करपा कडेन चड लक्ष दिता.
गुजरांतल्या अहमदाबाद हांका जाल्ल्या ट्रेड फेरांत गोंयच्या स्टॉलाक भेट दिवन गुजराती पर्यटकांनी गोंयचे विशीं चड म्हायती करून घेतली. गोंयांत पर्यटकां खातीर आशिल्ल्यो सुविधा आनी मेळपी ऑफरी हे विशीं तांका म्हायती मेळ्ळी. गोंयचे सुशेगाद वातावरण देशी तशेंच विदेशी पर्यटकांक सामकें मानवता. नवें वर्स आनी कार्निव्हला वेळार लाखांनी पर्यटक गोंयांत येतात.
गोंयचे सैम सोबीत दर्या देगो, पब, कॅफे, क्लब तशेंच सीफूड पर्यटकांत आगळो-वेगळो अणभव दितात. आव्हात सर्ती, ई-बायक, स्कुबा डायव्हींग, न्हंय राफ्टिंग, बँगी जंपींग आनी हॉट ऍर बलून्स हाचो पर्यटकांक आनंद घेवपाक मेळटा. गोंयांक 100 किलोमीटरांची दर्या देग आसा. हणजूण आनी हरमल हे पाश्चिमात्य पर्यटकांचीं आवडीची पर्यटन थळां आसात. बागा आनी कळंगुटे दर्या देगांनी देशी पर्यटक व्हडा संख्येन येतात. काणकोण तालुक्यांतल्या पाळोळें आनी आंगोद दर्या देगो पुराय संवसारांत फामाद आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
