भांगरभूंय | प्रतिनिधी
खूब खूब वर्सां पयलींची गजाल. गोंय नांवाचो शांत प्रदेश आशिल्लो. लोक भावार्थी, कारण नासतना कोणाचेच वाटेक वचपी न्हय. कश्ट करून पोट भरपी. चोरी, खून बी जालेच जाल्यार तातूंत एकाय गोंयकाराचो हात नासतालो. सुखान दीस सारताले ते. आतां हे काणयेक मोडण मेळ्ळां. तें गोंय अशांत जालां. कांय लोक सुवार्थी जाल्यात. सुवार्थ सादोवपाक कितेंय करपाची तांची तयारी. लोकसंख्या वाडटा. गोंयकारां इतलेच भायले लोक आसात, येत आसात. तरातरांचे सभाव, वृत्ती घेवन आनी धाम पातळची तशी ताची लागण नीज गोंयकारांकूय जाल्या. गँग्स आॅफ वास्सेपुराची काणी लजेन जीव दितली असल्यो काणयो, नाटकां, तमाशे गोंयांत जायत आसात. आरटीआय वावुरपी रामा काणकोणकार हांचेर काल करंजाळे हल्लो जालो. पांच जाणांनी तांकां गंभीर जखमी जायसर मार घालो. हल्लो करपी तरणाट्यांक रातीं अटक जाली. सीसीटीव्ही कॅमेरो आनी कोणेतरी मोबायल फोना वरवीं ही घडणूक शूट केल्या. रामा काणकोणकारूच न्हय तर पुलिसूय भितरल्या कांय जाणांक वळखल्ले. ते सांता क्रुझचे तरणाटे अशें तांणी सांजवेळार सांगिल्लें. तांकां खर ख्यास्त जातली अशी अपेक्षा. कारण बऱ्याच प्रकरणांनी अटक जाता, कांय दीस बंदखण आनी मागीर जामिनाचेर सुटका. ख्यास्त जाताच अशें ना. देखून गुंडांक पुलिसांचो भंय ना जाला. पणजे सारक्या गर्दी आशिल्ल्या शारांत भर दिसाचें येवन एकल्याक लोकां सामकार बडोवप आनी वचप, ही घडणूक इबाडिल्ल्या कायदो सुवेवस्थेचेर बोट दवरता. आतां पुलिसांचेर पुरावे एकठांय करपाची व्हडली जापसालदारकी आसतली.
रामा काणकोणकार हे राजकी, समाजीक प्रस्नांचेर टिका करपी व्यक्तीमत्व. आतां सोशल मिडियाचेर भ्रश्टाचार, गैरप्रकार, गैरकारभारा आड उलोवपी बरेच आरटीआय वावुरपी दिसतात. थोडे अजून सक्रीय आसात. तांणी उलयतना सभ्य भाशेंत, शांतपणान मुद्दो मांडपाक जाय. बोवाळ घालून काम जाताच अशें ना. ते वा हेर कोणूय जें कितें उलयतात, तें सत आसल्यार ती समस्या सोडोवपाक जाय. फट आसल्यार ताका जाप दिवपाक जाय. पुलिशेंत, कोर्टांतूय वचूं येता. गाळी संवप, मारप, धमकी दिवप, हल्लो करप, ब्लॅकमेल करप हो ताचे वयलो उपाय न्हय. असल्या प्रकारांक जल दिवप फुडाराक मारक थारूं येता. कोण विरोधांत उलयलो काय ताचेर हल्लो जावं येता. फाटीं दक्षीण गोंयांत सुरे, कोयते घेवन हल्लो केल्लो. रामा हांचेर कोणे हल्लो करपाक सांगलो, तें कळपाक जाय. तांकांय वेळार चाबूक बसप गरजेचें.
रामा काणकोणकार अदीं मदीं सैम, भ्रश्टाचार, आदिवासींचे हक्क, गांवांच्यो समस्या अश्या साबार प्रस्नांचेर आवाज काडटात. कांय म्हयन्यां पयलीं तांणी आझाद मैदानाचेर मुख्यमंत्री डाॅ. प्रमोद सांवत हांचे आड आक्षेपार्ह वक्तव्य केल्लें. एका पंचाक स्थलांतरितान धमकी दिल्ली, ताचेर कारवाय कित्याक जायना, असो प्रस्न करतना हें प्रकरण घडिल्लें. उपरांत रामा हे पुलिसांक तपासाक पालव दिनात म्हूण तांकां अटक जाल्ली. 14 दीस न्यायालयीन बंदखण जाल्ली…. आनी आतां अचकीत हो हल्लो.
सरकारी यंत्रणांनी आनी गोंयकारांनीय हे घडणुकेचेर शांत चित्तान विचार केल्यार बरो. हाचेर नियंत्रण येना जाल्यार फाल्यां विरोधांत उठपी कसलोय आवाज बंद जातलो. सामान्य लोकांकूय बाॅवन्सर घेवन भोंवचें पडूं येता. अटक केल्ल्या दुबावितांची फाटभूंय तपासल्यार बऱ्याच गजालींचेर उजवाड पडूं येता. गोंय हें पर्यटन राज्य. म्हणटकच असले प्रकार जावप आमकां मारक थारूं येता, हाची चत्राय सगल्यांक घेवची पडटली. हल्लो करप्यांक कांय वरां भितर धरिल्ले खातीर पुलिसांक परबीं. हल्ल्या फाटल्यान नेमको कोण आसा, तें बेगीन वदोवन घेयात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
