भांगरभूंय | प्रतिनिधी
-बदनामी करपी इन्फ्लूएंजर/एजन्सीचेर कारवाय करपाची मागणीपणजी : गोंयच्या बदनामी खातीर एक एजन्सी सोशल इन्फ्लूएंजरांक पयशे दिता. ह्या एजन्सीचेर कारवाय जावपाक जाय, अशी मागणी आमदार डिलायला लोबो हांणी केल्या. गोंयची प्रतिमा उजळ करपा सयत पर्यटनाची योग्य तरेन प्रसिद्धी करपा खातीर सरकारान एम्पेनल केल्ल्या सोशल मिडिया इन्फ्लुएंजरांची मजत घेतले. हे विशीं हांव पर्यटन मंत्री तशेंच मुख्यमंत्री डॉ. प्रमोद सावंत हांचे कडेन चर्चा करतलें, अशें शिवालेची आमदार डिलायला लोबो हांणी सांगलें.
शिवोलेची आमदार डिलायला लोबो हांणी काल मंत्रालयात मुख्यमंत्री डॉ. प्रमोद सावंत हांची भेट घेतली. एक एजन्सी गोंयची बदनामी करपा खातीर सोशल इन्फ्लूएंजरांक पयशे दिता. हाचेर कारवाय जावपाक जाय. गोंयची बदनामी करपी सोशल इन्फ्लंएंजरांक कावंटर करपा खातीर सोशल इन्फ्लूएंजर नेमपाची गरज आसा, अशें तांणी सांगलें.
गोंयांत अंदूं मोट्या प्रमाणांत पर्यटक आयिल्ले. सगळी हॉटेलां फुल्ल आशिल्ली. तरी लेगीत गोंयांत पर्यटक येनात, अशें सांगपी पोस्ट आनी फोटे व्हायरल जाले पूण 31 डिसेंबर तशेंच नव्या वर्साक गोंयांत मोट्या प्रमाणांत पर्यटक आयिल्ले. कोविडा उपरांत विदेशी पर्यटकांचो आकडो उणो जालो आसलो तरी तो ल्हव ल्हव वाडत आसा, अशें आमदार डिलायला लोबो हांणी सांगलें.
गोंयच्या पर्यटनाची बदनामी करपी सोशल मिडिया इन्फ्लूएंजरांचेर कारवाय जातली. सरकार बदनामी सोसचें ना, अशें पर्यटन मंत्री रोहन खंवटे हांणी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
