गोंय पर्यटनाच्या मळार निश्चीतच देशाची राजधानी जावंक शकता
भांगरभूंय | प्रतिनिधी
गोंयांत वर्साक सुमार 80 लाख पर्यटक येवन वतात. हो आंकडो राज्याचे लोकसंख्ये परस चड आसा. स दशकां आदीं हांगां हिप्पी येताले आनी ते उपरांत संवसारांतल्या कितल्याशाच वाठारांतले लोक गोंयांत पर्यटक म्हूण येवंक लागले. हातूंत देशी पर्यटकांचोय आंकडो वाडलो आनी दिसान दीस तो वाडत आसा. कोव्हीड काळांत पर्यटकांचो आंकडो सामको देंविल्लो आनी पोरूंच्यान तो परत जाग्यार पडत आसा. हे विशीं ’ट्राव्हेल अॅण्ड टुरिझम असोसिएशन ऑफ गोवा’ चे अध्यक्ष निलेश शाह हांची चैत्रा बोरकार हांणी घेतिल्ली मुलाखत.
गोंय पर्यटनाच्या मळार देशाची राजधानी जावंक शकता अशें केंद्रीय मंत्री नितिन गडकरी हांणी म्हणलां, तुमकां दिसता ही मोख सादपाक गोंयां कडेन तशी तांक आसा?
*गोंय हें ल्हान राज्य आसून लेगीत ज्या प्रमाणांत हांगां पर्यटकांक घेवन बोटी येतात, विमानां येतात आनी ट्रेनी हांगाच्यान पासार जातात, तें पळयल्यार गोंय हें पर्यटनाच्या मळार खरेंच देशाची राजधानी आसा. तशी तांक आमचे मदीं आसा. देखून केंद्रीय मंत्र्यान म्हुणल्या ती गजाल सारखी आसा अशें म्हाका दिसता. फकत आमकां कांय कडेन सुधारणां करपाक जाय.
तुमच्या मतान कसले तरेचीं सुधारणां करपाची गरज आसा?
- पर्यटक जेन्ना गोंयांत येता तेन्ना ताका सगळे तरेच्यो सुविधा मेळपाक जाय. ते खातीर साधनसुविधा आसपाकच जाय. आमी जर तर इको टुरिझमाच्या माध्यमांतल्यान पर्यटकांक गांवगिऱ्या वाठारां कडेन आकर्शीक करपाक सोदतात जाल्यार तांकां येरादारीची बरी सेवा मेळपाक जाय आनी ती परवडटा अशी आसपाक जाय. ते खातीर ’अॅप बेज’ टॅक्सी सेवा म्हत्वाची. पर्यटकांक खंयच्यानूय टॅक्सी बूक करपाक मेळपाक जाय. तेन्नाच पर्यटक परत परत गोंयांत येवंक सोदतलो. तशेंच तांकां फावो तशी सुरक्षा मेळपय गरजेचें आसा.
’अॅप बेज’ टॅक्सीच्या माध्यमांतल्यान थळाव्यांक लाव जातलो अशें दिसता?
हय! हाचो लाव तरणाट्यांक जातलोच. ह्या माध्यमांतल्यान रोजगार निर्माण जातलो आनी ते स्वताच्या वेवसायाचे पात्रांव जावंक शकतले. हातूंतल्यान पर्यटकांकय बरी सेवा मेळटली.
पर्यटनाच्या मळार वेवसाय करतल्यांक ’सोंपेपणान वेवसाय करपाक मेळ्ळ्यार ताचो लाव पर्यटनाच्या उदरगतीक जातलो?
- हय. पयलीं म्हणल्यार शॅकवाल्यांक बेगीन परवाने मेळपाक जाय. पर्यटन मौसम सुरू जावचे आदींच ह्यो गजाली सरकारी दरबारांतल्यान जावंक जाय.
खंयच्या देशांतले पर्यटक गोंयांत आयले जाल्यार राज्याक चड फायदो जावंक शकता?
- तुज्या म्हणण्या प्रमाण जे चड पयशे मोडटात ते…. तशें कांय ना, तशे आमच्या देशांतलेय पर्यटक खूब पयशे खर्च करतात. आमकां जाय ते बरे तरेन वागपी पर्यटक. हांगां येतकच तांणी कशें वागप हाची जबाबदारी तांकां आसपाक जाय. तांकां कशे आकर्शित करतले हाचेर आमी लक्ष केंद्रीत करपाक जाय. ते खातीर पर्यटन थळांचेर टॉयलेट, चेंजिंग रूम आनी हेर सुविधा आसपाक जाय. पर्यटकांक कागाळ करपाची संदच मेळपाक जायना. तेन्नाच ते परत परत गोंयांत येतले.
गोंय राज्याचें ’होम स्टे’ धोरण गोंयकारांक मदत करतलें अशें दिसता?
- हें धोरण सगळ्यांक फायदेशीर थारतलें. पर्यटकांकूय आनी गोंयच्या लोकांकय. तांकां येणावळीचें एक साधन मेळटलें आनी म्हाका दिसता खरेंच हें धोरण बरी सरबराय दिवंक शकतलें.
आतां चार्टर फ्लायट्स येवंक लागल्यांत?
- हय! नोव्हेंबराच्यान चार्टर फ्लायट्स येवंक लागल्यांत. रशियेच्यान सपत्कांत पांच येतात, ते खेरीज युके आनी कझकिस्तानाच्यान येवंक लागल्यांत.
पर्यटकांक ई-विजाची सुविधा मेळपाक लागल्या?
- हो प्रस्न मात्सो सुटपाक लागला. पूण तातूंत आनीकय गती येवपाची गरज आसा. लोकांक सोंपे तरेन विजा मेळ्ळ्यार ताचो लाव जातलो.
दर्यादेगांचेर ’टाव्टस्’ म्हणल्यार दलालांचे खूब त्रास जातात अशें आयकतात, ताचो परिणाम पर्यटनाचेर जाता?
- दर्यादेगांचेरच कित्याक, तुमी पणजे आयल्यार लेगीत तुमकां हे दलाल दिसतले. हे टावट्स सगळे कडेन आसात. तांची दादागिरी बंद करपाक जाय. ते पर्यटकांक त्रास करतात.
अंदूं पर्यटन वेवसाय बरो आसतलो?
- पोरूंचे तुळेंत अंदू वेवसाय खूब मंद आसा. विमानां आनी हॉटेलांनी ते खातीर आपले शुल्क देंवयल्यात. आतां घडये मुखार पर्यटन वेवसायाक गती मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
