भांगरभूंय | प्रतिनिधी
फॉर्मांत आयिल्ल्या स्नेहल कवठणकारान केल्ल्या 83 धांवड्यांच्या नेटार गोंयान रणजी गट क चार दिसांचे लडतीच्या पयल्या दिसा कर्नाटका आड आपल्या पयल्या डावांत 8 विकेटी वगडावन 228 धांवड्यो केल्यो.
काल सावन चार दिसांची लडत म्हैसुराच्या एसडीएनआरडब्ल्यू स्टेडियमाचेर सुरू जाली.
गोंयान हे मॅची खातीर तीन बदल केले. अपेशी थारिल्ल्या लक्ष्य गर्ग आनी विजेश प्रभुदेसाय हांकां भायर बसोवन तांचे सुवातेर हेरंब परब आनी फॅलिक्स आलेमांव हांकां निमाण्या इकरांत सुवात दिली. जाल्यार राहुल त्रिपाठीचे सुवातेर समर दुभाषीक खेळयलो. राहुलान वैयक्तीक कारणाक लागून मॅचींतल्यान फाटीं सरपाचो निर्णय घेतिल्लो.
गोंयान टॉस जिखून पयलीं बॅटींग करपाचो निर्णय घेतलो. गोंयची सदचे भशेन सुरवात बाबत जाली. ओपनर इशान गडेकार (6), के व्ही सिद्धार्थ (2) आनी सुयश प्रभुदेसाय (24) हे बाद जाल्ल्यान गोंयची स्थिती 3 बाद 45 अशी जाली. ते उपरांत स्नेहल कवठणकार (83) आनी मुखेली दर्शन मिशाळ (39) हांणी गोंयचो गडगडपी डाव सांबाळ्ळो. दोगांयनी चवथे विकेटी खातीर 192 बॉलांनी 82 धांवड्यांची भागिदारी केली.
कवठणकारान 193 बॉलांनी 83 धांवड्यो केल्यो. हातूंत णव चवक्यांचो आनी एका सक्याचो आस्पाव आशिल्लो. मिशाळान 98 बॉलांनी 39 धांवड्यो केल्यो. ताणें चार चवके मारले.
दर्शन मिशाळाक रोहीत कुमारान बाद केलो. ते उपरांत रोहीत कुमारान चंदीगडा आड फाटले मॅचींत शेंकडो मारपी दीपराज गांवकारा शुन्याचेर तंबूंत धाडलो. 5 बाद 131 धांवड्या वयल्यान समर दुभाषी वांगडा मेळून कवठणकारान सवे विकेटी खातीर 50 धांवड्यांची भागिदारी केली. हे दोगूय बाद जाल्या उपरांत मोहीत रेडकार वैयक्तीक 16 धांवड्यांचेर बोल्ड जालो.
पयल्या दिसाचो खेळ सोंपलो त्या वेळार अर्जुन तेंडुलकर आनी हेरंब परब वळेरेन 10 आनी 6 धांवड्यांचेर खेळटाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
