भांगरभूंय | प्रतिनिधी
गोंय आनी पंजाब ह्या पंगडां मदली रणजी मॅच उमळशीक वाडोवपी स्थितींत पावल्या.पर्वरी क्रिकेट अकादमीचेर चालू आशिल्ले चार दिसांचे लडतीचो निकाल आयज पयल्या सत्रांत लागपाची शक्यताय आसा. पूण, ही लडत कोण जिखतलो हाची उमळशीक गोंयच्या क्रिकेट मोग्यांक लागल्या.
पीच क्युरेटर सुर्यकांत नायकाची ही खेळपट्टी बॅट्समनांच कस लावपी थारली. बॉलरांचो शेक आशिल्ले हे खेळपट्टीचेर दोन दिसांनीच 32 विकेटी पडल्यो. पंजाबाक जैता खातीर 94 धांवड्यांची गरज आसतना दर्शन मिशाळ आनी मोहीत रेडकार हांणी दोनूय ओनपरांक 15 धांवड्यां भितर बाद करून गोंयाची आस्त वाडयल्या. पंजाबाक जैत जोडपाक आनीक 79 धांवड्यांची गरज आसा. निकाल आपले वटेन लावपा खातीर गोंयच्या बॉलरांक आयज पयल्या सत्रांत बरें प्रदर्शन करचें पडटलें.
गोंयचो पयलो डाव फकत 104 धांवड्यांचेंर सोंपयल्या उपरांत पंजाबान आपल्या पयल्या डावांत 190 धांवड्यो केल्यो आनी 86 धांवड्यांची म्हत्वाची आघाडी घेतली. पंजाबा वतीन अनमोलप्रीत सिंगान सगल्यांत चड 60 धांवड्यो केल्यो. गोंया वतीन दीपराज गांवकारान तीन जाल्यार दर्शन मिशाळ आनी मोहीत रेडकारान दरेकी दोन विकेटी घेतल्यो.
86 धांवड्यांनी फाटीं आशिल्ल्या गोंयचो दुसरो डाव 179चेर सोंपलो. एका वेळार गोंयची स्थिती 7 बाद 90 अशी जाल्ली. ते उपरांत दीपराज गांवकार, अर्जुन तेंडुलकर आनी मोहीत रेडकार हाणें गोंयचो डाव सांबाळ्ळो. तिगांयनी प्रतिस्पर्धी पंगडाच्या बॉलरांचो खर प्रतिकार करतना 89 धांवड्यांची भर घालून गोंयाक कांय प्रमाणांत संघर्श करपा सारकी धांवसंख्या उबारून दिली. दीपराजान 56 बॉलांनी 46 धांवड्यो केल्यो.ताणें आठ चवके मारले. अर्जुन तेंडुलकरान 37 बॉलांनी 18 धांवड्यो केल्यो. ताणें एक चवको आनी एक सको मारलो. मोहीत रेडकारान 32 बॉलांनी 44 धांवड्यो केल्यो. ताचे खेळींत चार चवके आनी पांच सक्यांचो आस्पाव आशिल्लो. पंजाबा वतीन प्रेरीत दत्तान पांच विकेटी घेतल्यो.
थोडे भितर धांवतकटोः गोंय, 41.2 ओव्हरींनी सगले बाद 104 धांवड्यो (इशान गडेकार 13, सुयश प्रभुदेसाय 21, के व्ही सिद्धार्थ 9, स्नेहल कवठणकार 9, राहुल त्रिपाठी 1, दीपराज गांवकार 8, दर्शन मिशाळ 17, अर्जुन तेंडुलकर 23, मोहीत रेडकार 1, हेरंब परब 0, वीजेश प्रभुदेसाय नाबाद 0, अतिरिक्त 2, मयांक मारकांडे 4-12, सिद्धार्थ कौल 2-40, बलतेज सिंग 2-37, अभिनव शर्मा 1-9).
पंजाब (पयलो डाव) 65 ओव्हरींनी सगले बाद 190 धांवड्यो (विश्व प्रताप सिंग 0, नमन धीर 4, अनमोलप्रीत सिंग 60, प्रभसिमरन सिंग 31, नेहाल वढेरा 0, मनदीप सिंग 21, अभिनव शर्मा 35, प्रेरीत दत्ता 20, मयांक मारकांडे नाबाद 8, सिद्धार्थ कौल 4, बलतेज सिंग 6 धांवड्यो, दीपराज गांवकार 3-30, दर्शन मिशाळ 2-21, मोहीत रेडकार 2-16, अर्जुन तेंडुलकर 1-30, हेरंब परब 1-53, वीजेश प्रभुदेसाय 0-39).
गोंय, (दुसरो डाव) 46.3 ओव्हरींनी सगले बाद 179 धांवड्यो (इशान गडेकार 3, सुयश प्रभुदेसाय 2, के व्ही सिद्धार्थ 20, स्नेहल कवठणकार 16, राहुल त्रिपाठी 13, हेरंब परब 3, दर्शन मिशाळ 7, दीपराज गांवकार 46, अर्जुन तेंडुलकर 18, मोहीत रेडकार 44, वीजेश प्रभुदेसाय नाबाद 0 धांवड्यो, प्रेरीत दत्ता 5-48, बलतेज सिंग 2-32, सिद्धार्थ कौल 2-48, मयांक मारकांडे 1-38) पंजाब, दुसरो डाव, 5.5 ओव्हरींनी 2 बाद 15 धांवड्यो (विश्व प्रताप सिंग 3, नमन धीर 5, मयांक मारकांडे खेळटा 7, दर्शन मिशाळ 1-10, मोहीत रेडकार 1-1).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
