भांगरभूंय | प्रतिनिधी
बंगळुरूच्या अलूर क्रिकेट मैदानाचेर जाल्ले विजय हजारे करंड क्रिकेट सर्तींतले मॅचींत गोंयाक तामिळनाडू आड 58 धांवड्यांनी हार घेवची पडली.
टॉस हारल्या उपरांत पयलीं बॅटींग करतना तामिळनाडून निर्धारीत 50 ओव्हरींनी 4 विकेटी वगडावन 373 धांवड्यांचो दोंगर उबारलो. ताचे ओपनर साई सुदर्शनान आनी एन जगदीशन हांणी शेंकड्यांची नोंद केली. सुदर्शनान 112 बॉलांनी 117 धांवड्यांची खेळी केली. हातूंत 13 चवक्यांचो आस्पाव आशिल्ल. जाल्यार जगदीशनान 140 बॉलांनी 168 धांवड्यो केल्यो. ताणें 15 चवके आनी स सके मारले.
दोगांयनी पयले विकेटी खातीर 276 धांवड्यांची भागिदारी करून गोंयाक निर्शेणी हाडली.
गोंया वतीन अर्जुन तेंडुलकर आनी सुयश प्रभुदेसाय हांणी दरेकी 2 विकेटी घेतल्यो.
प्रत्युत्तर दितना गोंयान जबरदस्त सुरवात केली. इशान गडेकार आनी स्नेहल कवठणकार हांणी शेंकड्याची भागिदारी केली. गडेकारान 49 बॉलांनी आठ चवके आनी एका सक्याचे मजतीन 51 धांवड्यो केल्यो, जाल्यार कवठणकारान 67 धांवड्यो केल्यो. हातूंत स चवक्यांचो आनी एका सक्याचो आस्पाव आशिल्लो.
उपरांत एकनाथ केरकार (50), सिद्धेश लाड (नाबाद 62), दीपराज गांवकार (42) आनी मोहित रेडकार (16) हांणी आकर्शक बॅटींग केली. पूण तामिळनाडून उबारिल्ल्या धांवड्यांच्यो दोंगरा मुखार तांचे यत्न उणे पडले. अखेरेक गोंयाक निर्धारीत 50 ओव्हरींनी 6 विकेटी वगडावन 316 धांवड्यो करप शक्य जाल्यो.
थोडे भितर धांवतकटोः तामिळनाडू, 50 ओव्हरींनी 4 बाद 373 धांवड्यो (बी साई सुदर्शन 117, एन जगदीशन 168, शाहरुख खान 29, बाबा अपराजीत नाबाद 31, जे कौशीक 17 धांवड्यो, अर्जुन तेंडुलकर 2-61, सुयश प्रभुदेसाय 2-87) जैत आड गोंय, 50 ओव्हरींनी 6 बाद 316 धांवड्यो (ईशान गडेकार 52, स्नेहल कवठणकार 67, एकनाथ केरकार 50, सिद्धेश लाड नाबाद 62, दीपराज गांवकार 42, मोहित रेडकार 16, लक्ष्य गर्ग नाबाद 10 धांवड्यो).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
