गोंय पंगडाची झणझणीत सुरवात

भांगरभूंय | प्रतिनिधी

 रणजींत पदार्पण करपी अभिनव तेजराणा (खेळटा 130)  हाचो नाबाद शेंकडो आनी वेवसायीक क्रिकेटर ललित यादव (खेळटा 80) हाच्या वांगडा केल्ले 176 धांवड्यांचे नाबाद भागिदारी नेटार येजमान गोंय पंगडान पर्वरी क्रिकेट अकादमीच्या मैदानाचेर (पीसीए) चंदीगड पंगडा आड रणजी क्रिकेट मॅचीचे एलीट ब गटांतले मॅचीच्या पयल्या दिसा 3 बाद 291 धांवड्यो उबारपाक मजत केली.

तेजराणान 225 बॉलांक तोंड दितना 12 चवके आनी दोन सके मारले. ललितान 174 बॉलांक तोंड दितना आठ चवके मारले आनी दोन सके मारल्यात.

ते आदीं, टॉस जिखून गोंय पंगडान पयलीं बॅटींग करपाचो योग्य निर्णय घेतलो, कारण पीसीएची खेळपट्टी सपात आशिल्ली. ओपनर मंथन खुटकार आनी सुयश प्रभुदेसाय हांणी सादूरतायेन खेळ केलो आनी पयले विकेटी खातीर 45 धांवड्यांची भागिदारी केली. चंदीगडाक पयलें येस 14वे ओव्हरींत मेळ्ळें. ऑफ स्पिनर विष्णू कश्यपान ओपनर मंथन खुटकाराक बाद केलो. सरळ बॉलाचेर क्रॉस खेळपाच्या यत्नांत मंथनान स्लिपांत उबो आशिल्ल्या मुखेली मनन वोहराच्या हातांत कॅच दिली.

ते उपरांत सुयश प्रभुदेसायान (47) तेजराणा वांगडा दुसरे विकेटी खातीर 97 बॉलांनी 70 धांवड्यांची भागिदारी करून गोंयच्या डावाक गती दिली. आत्मविस्वासान भरिल्ल्या सुयशाक विष्णून बाद केलो. मिडविकेटींत उबो आशिल्ल्या अंकित कौशिकान ताची कॅच धरली. तेच ओव्हरींत विष्णून फाटल्या रणजी हंगामांत गोंया वतीन धांवड्यांचो पावस घालपी कश्यप बखलेक एलबीडब्ल्यू बाद केलो. कश्यपाक खातें लेगीत उगडपाक जमलें ना.

ते उपरांत अभिनव तेजराणा आनी ललित यादव हांणी सादूरतायेन बॅटींग केली बॉलाचे गुणवत्ते प्रमाण खेळ करीत गोंयाक बरे स्थितींत हाडलो. चंदीगडा वतीन तिनूय विकेटी विष्णून घेतल्यो.

थोडे भितर धांवतकटोः गोंय (पयलो डाव) 86 ओव्हरींनी 3 बाद 291 धांवड्यो ( मंथन खुटकार 21, सुयश प्रभुदेसाय 47, अभिनव तेजराणा खेळटा 130, ललित यादव खेळटा 80, विष्णू कश्यप 3-86).