भांगरभूंय | प्रतिनिधी
अंदूंचे रणजी क्रिकेट हंगामाक उत्कृश्ट करतना येजमान गोंय पंगडान आपले पयले लीग मॅचींत चंदीगढ पंगडाक डाव आनी 75 धांवड्यांनी हारायलो. पर्वरी क्रिकेट अकादमीचेर जाल्ले एलीट ब गटांतली ही मॅच जिखिल्ल्यान गोंयाक बोनस गुणा सयत 7 गूण फावो जाले.
गोंयान पयल्या डावांत धांवड्यांचो दोंगर उबारून जैताची बुन्याद घाली. ह्या धांवड्यां मुखार चंदीगढाचो डाव गडगडलो. तांचो पयलो डाव गोंयच्या बॉलरांनी फकत 137 धांवड्यांचेर गुठलावन तांकां सुरवातीकूच बॅकफुटाचेर धुकल्लो.
काल अखेरच्या दिसा 3 बाद 159 धांवड्यां वयल्यान मुखार खेळपाक सुरवात करपी चंदीगढाचो दुसरो डाव दर्शन मिशाळ (5-124) आनी मोहित रेडकार (3-93) हांचे स्पिन बॉलिंगे मुखार 354 धांवड्यांचेर सोंपलो. 76 धांवड्यांचेर नाबाद आशिल्लो अर्जुन आझादान आपले पयले पयले श्रेणीचे मॅचींत शेंकडो मारलो. ताणें 216 बॉलांनी 16 चवके आनी एक सको मारून 141 धांवड्यांची खेळी केली.
अर्जुनाक अंकित कौशिकान बरी साथ दिली. अंकितान 112 बॉलांनी 8 चवके आनी तीन सक्यांचे मजतीन 82 धांवड्यो केल्यो. अर्जुन आनी अंकितान चवथे विकेटी खातीर 220 बॉलांनी 153 धांवड्यांची भागिदारी केली. दर्शन मिशाळान ही जोडी फोडली. ताणें अंकिताक बाद केलो. कश्यप बखलेन ताची कॅच धरली. 37 धांवड्यांच्या अंतरान दर्शनान अर्जुनाक बाद करून गोंयच्या जैता मुखार आशिल्ली व्हड आडखळ पयस केली.
अंकित आनी अर्जुन बाद जाल्या उपरांत चंदीगडान थारावीक अंतरान आपल्यो विकेटी व्हगडायल्यो. मोहित रेडकारान एकेच ओव्हरींत दोन विकेटी घेतल्यो. पयलीं ताणें 77वे ओव्हरीच्या चवथ्या बॉलाचेर राजांगड बावाक बोल्ड केलो. उपरांत अखेरच्या बॉलाचेर जगजीत सिंग संधूक बाद केलो. ताची कॅच बखलेन धरली.
विशूक दर्शनान आनी निशुंक बिर्लाक मोहितान बाद केल्या उपरांत सैनी हाका दर्शनान बोल्ड करून गोंयाक आकर्शक जैत मेळोवन दिलें.
गोंया वतीन दर्शन मिशाळान 124 धांवड्यांनी 5, मोहित रेडकारान 93 धांवड्यांनी 3 जाल्यार अर्जुन तेंडुलकर आनी ललित यादव हांणी दरेकी एक विकेट घेतली.
गोंयची दुसरी मॅच कर्नाटक पंगडा आड बंगळुरूंत 25 ते 28 ऑक्टोबर ह्या कालावधींत जातली.
धांवतकटोः गोंय (पयलो डाव) 566, चंदीगड (पयलो डाव) 137, चंदीगढ (दुसरो डाव) 3 बाद 159 धांवड्यां वयल्यान मुखार (अर्जुन आझाद कॅ कश्यप बखले बॉ दर्शन मिशाळ 141, अंकित कौशिक कॅ कश्यप बखले बॉ दर्शन मिशाळ 82, राजांगड बावा बो मोहित रेडकार 18, मयंक सिधू नाबाद 33, जगजीत सिंग संधू कॅ कश्यप बखले बॉ मोहित रेडकार 0, विष्णू कश्यप कॅ अभिनव तेजराणा बॉ दर्शन मिशाळ 6, निशूंक बिर्ला कॅ विकास सिंग बॉ मोहित रेडकार 10, सैनी बो दर्शन मिशाळ 8) 91.4 ओव्हरींनी सगले बाद 354 धांवड्यो.
बॉलींगः अर्जुन तेंडुलकर 15-2-69-1, दर्शन मिशाळ 35.4-3-124-5, मोहित रेडकार 25-1-93-3, ललित यादव 12-1-36-1, अभिनव तेजराणा 1-0-2-0, हेरंब परब 3-1-16-0.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
