भांगरभूंय | प्रतिनिधी
गोंय पंगडाक 63 धांवड्यांनी हारोवन रेल्वे पंगडान रणजी क्रिकेट सर्तींतले लीग लडतांत उत्कृश्ट जैताची नोंद केली. सुरतच्या लालभाय कॉंट्रेक्टर स्टेडियमाचेर खेळयिल्ले मॅचींत रेल्वे पंगडाचो स्पिनर आकाश पांडेन गोंयचो डाव गडगडावन उडयलो. ताणें गोंयच्या दुसऱ्या डावांत 71 धांवड्यो दीत वट्ट 9 विकेटी घेतल्यो. ताणें मॅचींत 133 धांवड्यो दिवन वट्ट 13 विकेटी घेतल्यो.
चवथ्या डावांत स्पिनरांक जबरदस्त मजत करपी खेळपट्टीचेर गोंयच्या बॅट्समनांनी रेल्वे पंगडाच्या स्पिनरां मुखार आनी मुखेलपणान आकाश पांडे मुखार दिमी मारली.
गोंयाक जैता खातीर 306 धांवड्यांची गरज आशिल्ली. 1 बाद 93 धांवड्यां वयल्यान खेळपाक सुरवात करपी गोंयचो दुसरो डाव फकत 242चेर सोंपलो. एका वेळार सदचे भशेन मदली फळी गडगडल्या उपरांत 2 बाद 116 वयल्यान 6 बाद 148 अशी गोंयची बिकट स्थिती जाल्ली. ते उपरांत सदचे भशेन दर्शन मिशाळ, मोहीत रेडकार आनी हेरंब परब हांणी आक्रमक बॅटींग करून गोंयचो स्कोर अडीशचें लागसार हाडलो.
ते पयलीं सुयश प्रभुदेसाय (67) बाद जालो. ताणें स्नेहल कवठणकारा वांगडा मेळून दुसरे विकेटी खातीर 76 धांवड्यांची भागिदारी केली. ते उपरांत दीपराज गांवकार, स्नेहल कवठणकार, मंथन खुटकार आनी के व्ही सिद्धार्थ हे रोखडेच बाद जाले.
दर्शन आनी मोहीत हाणें सातवे विकेटी खातीर 30 धांवड्यांची भर घाल्या उपरांत मोहीत, दर्शन आनी गर्ग बाद जाले. ते उपरांत हेरंबान फॅलिक्सा वांगडा मेळून 10वे विकेटी खातीर 33 धांवड्यो जोडल्यो.
गोंय आपली निमाणी लीग मॅच गुजरात पंगडा आड 16 ते 19 फेब्रुवारी मेरेन पर्वरी क्रिकेट अकादमीचेर खेळटलो.
थोडे भितर धांवतकटोः रेल्वे (पयलो डाव) 297, गोंय (पयलो डाव) 200, रेल्वे (दुसरो डाव) 208, गोंय (दुसरो डाव) सगले बाद 242 (सुयश प्रभुदेसाय 67, स्नेहल कवठणकार 37, दीपराज गांवकार 5, मंथन खुटकार 17, के व्ही सिद्धार्थ 2, दर्शन मिशाळ 33, मोहीत रेडकार 20, लक्ष्य गर्ग 0, हेरंब परब 34, फॅलिक्स आलेमांव नाबाद 6 धांवड्यो.
बॉलींगः आकाश पांडे 9-91, प्रथम सिंग 1-50).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
